[A:92a]des lhan cig skyes grub snga ma mdzad/ rnal 'byor ma bi na sa badzwa de u rgyan gyi rgyal po na ba la ltas mkhan gyis rgya mtsho'i chu dgos zer ba la/ sus nus dril bsgrags pas/ 'dul ba'i dus yin par dgongs te ngas nus zhes smras so/ /der bos te rgyal po'i yang thog na 'dug bzhin du bum pa chus bkang ste rgyal po la phul bas/ de nad las drag cing rgyal pos 'di ni mkha' 'gro ma ste/ 'di dang 'brel na 'khor ba las thar ro snyam ste/ de la dga' mgur spyad pas sras shig sbrum pa de la indra bhU ti/ rab tu byung bas lwa ba pa ste sngar bshad pa nyid do/ /'di la indra bhU ti chung ba zer ro/ /slob dpon Dombi he ru ka nags gseb tu sgom gyin bzhugs pa'i tshe/ rigs ngan gyi bu mo phyag rgyar bsten pa de zas slong du btang ba na rab tu byung ba mang po mchod rten gyi las bgyid pa la slong mi mkhas pas de dag gi brdungs pas/ de khros nas slob dpon la zhus pas tshar bcad pa'i 'os min te 'dul bar bya'o zhes zhal gyis bzhes nas der byon te sdigs mdzub gtad pas mchod rten rnams mgo zhabs log go /thams cad kyis grub thob tu shes nas bzod par gsol bas gcig phyi rabs kyi rnal 'byor pa rnams la nus pa bstan par bzhed nas bzhag gzhan rnams sngar bzhin byas pas/ de dag gi gtso bo paNDYi ta spyad dka' zla ba'am/ mi thub zla ba phyag phyir 'brangs pa la dgyes pa rdo rje'i dbang rgyud man ngag bshad/ des kyang grub pa thob bo zhes grags so/ /slob dpon sengge bzang po'i slob ma sangs rgyas ye shes kyi lo rgyus ni/ rig pa'i gnas thams cad la mkhas pa zhig ste/ kha bi zhes bya ba grong khyer rdo 'jog tu/ slob dpon sengge bzang po bsten te/ shes rab kyi pha rol tu phyin pa'i tshul la sbyangs pas mthar phyin pa lobs shing / nA lendrar byon te bshad cing rgyud 'grel brtsams/ de nas sngags kyi theg pa 'tshol ba'i phyir du grub chen phag tshang pa la 'dus pa'i phyogs 'ga' zhig gsan/ paNDYi ta lnga brgya'i dbus su sher phyin 'chad pa'i tshe/ slob dpon de rod ngan gos srul ba rigs ngan phag 'tsho ba'i tshul du mdun rol du 'ongs pa slob ma ngo tsha nas ma mthong ba skad byas pas/ de nyid du spyan gnyis sa la brul/ bzod par gsol