[A:374] dbang po bag la nyal dang mthun par smin grol gyi mdzad pa rgyun mi chad do/
/sa 'dzin mkhas grub gtsug na rab mdzes shing / /so sor rtog pa'i blo gros 'od brgya rgyas/ /si ta'i rgyun 'dra'i sdug bsngal chuu bo skems/ /su la'ang byams pa'i sems kyis kun du khyab/ /ma lus shes bya'i chos kun mkhyen gyur cing / /me tog mda' can rab tu pham mdzad de/ /mu med srid pa'i g.yang sar lhung ba rnams/ /mi zad thugs rje'i lcags kyus 'dren mdzad rgyal/ /dus gsum rgyal ba'i rnam 'phrul chos kyi rje'i/ /rmad du byung ba'i phrin las dpag yas las/ /dad pas cha tsam blangs te bkod pa yis/ /rnam par grol ba'i yon tan rab rgyas shing / /sgrib gnyis dri med bag chags kun bsal te/ /dpal ldan bla ma gang du gshegs pa yi/ /zhing khams rnam dag bde ba can song nas/ /chos kyi rgyal po 'od dpag med pa la/ /byang chub mchog gi lung bstan rab thob nas/ /rgyal ba'i sku gsung thugs kyi mdzod 'dzin cing / /sems can re re'i mdun du bdag gnas te/ /mkha' mnyam 'gro ba 'dren pa'i dpal du shog /de ltar che ba'i yon tan du ma dang ldan pa'i sprul sku mchog gi rnam par thar pa rin po che'i phreng ba zhes bya ba mi 'phrogs pa'i mkhyen rab dang / thugs rje phun sum tshogs pa/ khams gsum chos kyi rgyal po rgyal ba brag phug pa'i zhabs rdul spyi bos len pa dpal ldan blo gros brtan pas lcags mo yos kyi lo ston zla tha chungs smin drug gi zla ba'i tshes gcig la sbyar ba'o//