[A:397]la la dag na re chos rje pa 'di yang phyag rdzas rnams don med la za ru 'jug cing su dpral ko mthug mthug gis gang zhu zhu/ rang phyogs zhabs tog byed pa bas gzhan phyogs nas gnod pa 'chol tshad byed pa tsho la thugs rtsis che zhing thugs la 'dogs pa dgra gnyen ngo mi shes pa zhig ste/ 'jig rten gyi 'dun ma dang tshe 'di'i dpon 'ong ba de min/ mgo 'don bdag gnyer zhun gzhan la yod pa yin te zhes skye bo thams cad smra mod/ skyes bu dam pa rnams tshe 'di'i ched du rang phyogs gces par bzung nas skyong / gzhan la sdang bas sun 'byin pa ni dam pa ma yin pas/ chos rje nyid ni dgra gnyen thams cad mnyam pa nyid du dus tshod gnas skabs bstun na ji ltar phan 'dogs par nus pas phan bde la 'god par mdzad pa zhig go zhes dam pa rnams ni chos rje nyid la bsngags par mdzad do/ /rig pa 'dzin pa'i dam tshig nyi shu la bslab tshul gsum dang / nyin zhag phrugs gcig la lam dus kyi dbang bzhi rgyas bsdus gang rung rdo rje 'chang nas da lta'i bar du brgyud pa bar ma chod pa len pa dang / rgyun dang khyad par gyi dus su bshags sdom la sogs pas dus rtag par rig pa 'dzin pa'i dam tshig dang sdom pa rnam par dag pa dang ldan pa'i rdo rje 'dzin pa tshad ldan yin no/ /mdor na gsang sngags kyi sgo nas pha rol tu phyin pa drug gam bcu la rtag par spyod pas dus 'da' zhing / bsdu ba bzhis sems can gyi don mdzad pas tshul khrims gsum rnam par dag pa dang ldan pa'o/ /'phan yul gyi dro ba kun mkhyen zhes pa/ pha dam pa dang sha wa ri dbang phyug la sogs pa zhal gzigs shing gsung gleng yod pa sgrub pa kho na la bzhugs pa'i mkhas pa chen po cig bzhugs pa'i ting nge 'dzin gyi snang ba la nyan po dgon pa na bcom ldan 'das shAkya thub pa 'khor mang po la chos gsung gin 'dug pa cig byung bas/ zhag 'ga' nas chos rje pa der byon nas phar phyin