[A:389] khro ba dang 'khon du 'dzin pa dang bral ba/ gzhan la snying brtse ba dang / thams cad la byams pa'i thugs dang ldan pa/ gzhan gyis co 'dri ba dang bsdigs pa la sogs kyi rgol bas glags mi rnyed pa/ skyes bu dam pa'i rnam thar bzod pa dang des pa'i ngang tshul can/ klog dang yi ge la sogs pa rig pa thams cad brda phrad pa dang / mthong ba tsam dang / thos pa tsam gyis mkhyen pa/ rnam dpyod gsal zhing chags pa dang rnam par 'tshe ba la sogs pas srog chags dman pa la yang brnyas pa dang smod pa spangs pa/ zhi ba dang dul ba la sogs yon tan du ma dang ldan par gyur to/ /gnyis pa lung rtogs kyi yon tan brnyes pa'i tshul ni/ 'khrungs nas zla ba gsum tsam nas ting nge 'dzin zab mo la mnga' brnyes shing mngon par shes pa dang ldan pa chos rje nyan po ba bsod nams brtan pa las bde mchog dril bu pa'i dbang gsan/ de nas dgung lo gsum tsam bzhes pa na mkhas grub chen po rong pa shes rab seng ges sku rim pa mdzad de/ gshin rje'i gshed dmar po lha lnga'i dbang bskur yang gsan/ de tsam na sgro smon can gyi bla ma bzang po pa la sa lugs kyi 'jam dbyangs a ra pa tsa na'i lung nos nas bla mas kyang sgrub grogs mdzad de zla ba gsum tsam bsgrubs pas thugs rab thogs pa med pa byung / brtsams pa thams cad kyi mgor yang 'jam pa'i dbyangs la mchod brjod mdzad/ de nyid la thog mar brtag gnyis kyi bshad sbyar mdzad/ dgung lo brgyad pa la rin chen sgang du sde snod 'dzin pa du ma'i dbus su/ rgya bod kyi mkhas grub du ma dang / yab mes gong ma rnams kyi bzhed srol phyin ci ma log par rnam grangs du mas gsal zhing rgya che bar gsungs pas/ sde snod 'dzin pa thams cad kyang ngo mtshar zhing snyan pa'i grags pa sgrogs so/ /de nas yab yum la sogs pa la rab tu byung ba'i zhu ba nan cher zhus kyang yun ring por ma gnang / rab tu byung ba la dka' las chen