[A:407]'dug pas de'i mkhan po don grub dpal ba'i drung du rab tu byung nas mtshan yang dpal ldan tshul khrims zhes bya bar btags so/ /mkhan po de nyid las 'dul ba mdo rtsa/ so sor thar pa ka ri ka lnga bcu pa la sogs pa gsan no/ /dgung lo bcu gcig pa la chos rje ri khrod pa dang mjal nas phyag rgya chen po lhan cig skyes sbyor gsan pas mos gus tshad med pa skyes te/ bla ma 'di nga'i tshe snga ma nas kyi bla ma cig ye yin da 'di'i rjes la 'gro dgos bsams te/ phu bo la byas pas/ khong gi bla ma la zhus pas bla ma yang shin tu mnyes te/ 'di la nga'i bu byed do gsungs nas chag phyir byon/ dpal kye rdo rje'i rdul tshon du dbang bskur ba zhus/ de nas res cig sa skyar bzhugs te rgyud gsum la gzigs rtog mdzad/ chos rje pa brag phug tu byon rjes su chos rje pa'i zhal tas brag phug tu shog gsung pa byung nas/ brag phug tu phyin nas chos rje pa dang mjal bas/ da khyod dgon pa 'dir bsdad/ sgom chen cig byas pa drag gsungs nas/ gsung ngag rin po che lam 'bras bu dang bcas pa yongs su rdzogs par gnang ste/ brag phug gi dgon pa byings po'i mthor ba cig tu spyil po cig mdzad nas lo drug gi bar du sgrub pa mdzad pas nyams dang ting nge 'dzin bsam gyis mi khyab pa 'khrungs/ bla ma'i gsung nas khyod la sgom dga' mo cig skyes 'dug /sgom chen pa pher ba 'dug gsungs nas gegs sel la sogs pa'i gdams ngag thun mong ma yin pa rnams kyang yongs su rdzogs pa gnang / gzhan yang sbyor drug la sogs pa'i khrid ka mang po dang / bde mchog lo nag dril gsum gyi dbang la sogs pa bde mchog gi skor yongs su rdzogs pa dang / gzhan yang 'jigs byed/ gshed dmar/ gsang 'dus/ sgrol ma la sogs pa'i dbang dang / chos skyong che chung gi rjes gnang la sogs pa yongs su rdzogs par gnang / de nas khyod sgom gsha' ma cig