[A:414]mtha' yas pa la dbang 'byor pa'i bdag nyid grub chen buddha shrI zhes grags pa 'di'i yab ti shrI kun dga' rgyal mtshan gyi zhabs 'bring ba chen po gu shrI dpal 'byor legs pa zhes bya ba/ hor yul du dpal dus kyi 'khor lo'i rgyud 'grel gyi par mdzad pa po de dang / yum sgrol ma 'bum gnyis kyi sras su sa mo yos kyi lo la/ la stod byang gi sa phyogs mdog gi dgon pa sgo phu zhes bya bar sku 'khrungs/ chung ngu nas bla ma shAkya bzang po las dge bsnyen zhus/ tshe dpag med kyi dbang nod de mtshan sangs rgyas dpal du btags/ spyod 'jug la kha don byed pa'i ma ma cig dang lhan cig tu bzhugs pas gzhung thugs su chud/ klog dang yi ge la sogs pa sbyangs nas dge bsnyen gyi rten de nyid la sgo phur bshad gsar mdzad/ rang gi zhang po slob dpon dhwa dza shrI la brtag pa gnyis pa'i rgyud dang / kye rdo rdo'i lag len la sogs pa slob gnyer mang du mdzad/ dgung lo nyi shu rtsa gsum la gnas lnga rig pa'i paNDi ta chen po chos rje sa bzang pas mkhan po dang / mkhas shing grub pa brnyes pa lo tsA ba chen po byang chub rtse mos las kyi slob dpon dang / sde snod 'dzin pa mkhan chen sangs rgyas bzang pos gsang ste ston pa'i slob dpon mdzad nas dpal bzang ldan gyi gtsug lag khang du rab tu byung ba dang bsnyen par rdzogs pa dus gcig tu mdzad de/ sngar gyi mtshan saM skr-i tar bsgyur nas buddha shrI zhes par btags so/ /rab tu byung ba'i dga' ston dang yab rgya yul du gshegs pa'i tshogs bsog rgya chen po mdzad do/ /de nas mkhan chen shes rab rgya mtsho ba las phar phyin dang mngon pa kun las btus la slob gnyer mdzad cing snga phyir chos mang du gsan/ mkhan chen mgon rgyal ba las rnam 'grel gyi slob gnyer cung zad mdzad cing snga phyir chos du ma gsan/ dpal ldan sa skyar rtog ge pa dpal ldan bzang po shangs pa blo mchog tu grags pa la rnam 'grel gyi slob gnyer mdzad pa nyi thog gi las tshab dang 'chad nyan la sogs pa dgung lo sum cu so gcig gi bar du