[A:432]/ /snyigs dus kyi rdo rje 'chang chen po chos kyi rje kun dga' bzang po'i rnam par thar pa mdor bsdus pa/
rje btsun bla ma thugs rje chen po dang ldan pa'i zhabs la gus pas phyag 'tshal lo/ /dge legs kun 'byung tshul khrims sa gzhir byang chub sems kyi myu gu 'khrungs/ /gsung rab mkha' la thos bsam sprin tshogs lung rigs snyan pa'i 'brug sgra can/ /bslab gsum rim gnyis zim bu'i char babs skal ldan rma bya'i tshogs rab dga'/ /don gnyis lo tog bzang po mthar phyin bla ma'i zhabs kyi padmor 'dud/ /rgyal ba kun gyi mkhyen brtse gcig bsdus mtha' yas 'gro ba'i gnyen gcig pu/ /rmongs pa'i mun pa drung nas rab 'byin bde gshegs bstan pa'i sgron me 'dzin/ /dmigs med thugs rjes gzhan don la dga' rgya chen lhun gyis grub pa yi/ /phrin las bzang po'i nor bu rin chen skye dgu'i gtsug na mdzes la 'dud/ /shes bya kun la legs sbyangs mthar phyin nas/ /mkhas rnams dga' ba'i 'chad rtsod rtsom pa yis/ /bstan pa'i khur chen ring du khyer ba po/ /phyogs las rnam rgyal bzang po'i zhabs la 'dud/ /de yi rnam thar mtha' dag su yis spobs/ /rgya mtsho che las chu yi thigs pa ltar/ /ding sang yongs grags phrin las rgya mtsho las/ /cha shas tsam cig dang bas 'dir brjod bya/ /'dir bdag cag gi 'dren pa dam pa bstan pa rin po che'i mnga' bdag /gsung rab dgongs 'grel dang bcas pa ma lus pa'i bang mdzod rje btsun mkhyen rab kyi dbang phyug kun dga' bzang po pa zhes yongs su grags pa 'di nyid ni/ shes bya thams cad chags thogs med par mngon sum du gzigs pa'i ye shes kyi spyan brnyes par gdon mi za mod/ 'on kyang ding sang gi skye bo rnams kyi snang ngo dang mthun par tshul bzung ba 'di'i dbang du byas pa'i rnam par thar pa cung zad cig brjod par bya ba la gnyis te/ rab tu ma byon pa dang / rab tu byon pa'i rnam par thar pa'o/ /dang po ni/ 'di'i rigs ni