[A:585]legs par gnas zhes ston pa yin/ /a ho sngon dge'i las can blo ldan rnams/ /brda 'di bzung nas don 'di bsam mdzod dang / /ston dang bstan pa 'di la bdud las kyis/ /mi phyed dad pa'i nor dang ldan par 'gyur/ /ma rtogs log rtogs rnyog ma'i chus gang ba'i/ /khron par gnas pa'i sbal chung ngang tshul can/ /de dag kun gyi snying gi sdong dum la/ /'gyod pa'i me chen rab tu 'bar bar 'gyur/ /de slad mgon de'i bka' srol bdud rtsi dang / /nyi 'od yin bzhin nor ltar 'gro kun gyi/ /nyon mongs nad dang rmongs pa'i mun sel zhing / /phan bde'i 'byung gnas mchog 'di gces par zungs/ /bdag kyang deng nas yang srid thams cad du/ /'dren pa mchog de'i zhabs pad gus mchod cing / /dgongs don dri med gru chen legs bzung nas/ /'gro kun srid pa'i mtsho las sgrol bar shog /ces bya ba de dag gis ni 'dren pa dam pa de nyid kyi gsung tshig rkang bdun po'i don 'ol byi tsam du bkrol ba yin la/ 'di la gsung sgros 'ga' zhig las/ gcan lung gi ri bo sgang du rje btsun dkar po rnam gsum sa paN dang bzhi gzigs pa de nyid bka' rgya thim pa'i gzigs snang yin gsung pa ni sgros ma nges par snang ste/ ri bo sgang du gzigs pa ni/ thog ma'i lam 'bras gsungs bzhin pa'i skabs yin zhing / gzigs pa'i rgyu mtshan yang gzhan yin la/ 'dir bshad pa ni lam 'bras gtan nas ma gsungs pa'i bka' rgya thim nas gsungs pas chog gam mi chog the tshom cung zad 'khrungs pa'i tshe/ gsung pas chog pa'i rtags su gzigs pa yin no/ /des na 'di gnyis la gnas dang dus dang gzigs pa'i lha rnams la khyad par shin tu che ba yod pas gcig tu gzung bar mi bya'o zhes pa 'di ni dge slong dpal ldan don grub kyis dpal e waM chos ldan du bris pa'o// //mangga laM//