[A:586]/ /rje btsun bla ma mus pa chen po'i rnam par thar pa ngo mtshar rgya mtsho zhes bya ba/ dpal ldan bla ma dam pa'i zhabs la gus pas phyag 'tshal lo/ /rgyal ba rgya mtsho'i gsung rab rgya mtsho blo gros rgya mtshos yongs bzung ste/ /rgyal sras rgya mtsho'i spyod pa rgya mtsho brtson pa rgya mtshos legs bsgrubs pas/ /mdo rgyud rgya mtsho'i dgongs pa rgya mtsho lag len rgya mtsho'i tshogs bcas kyis/ /skal ldan rgya mtsho'i dad pa rgya mtshor gdams pa rgya mtshos bltams mdzad rgyal/ /skyon med yon tan kun gyi mdzod mnga' khyod kyi rnam thar ma lus pa/ /grangs med lce yis bskal par brjod kyang bas par mi 'gyur de lta na'ang / /bslu med ngag gi thun mong grags pa tsam zhig 'dir ni brjod pa la/ /zol med dad pa'i yid ldan don gnyer tshogs rnams dga' bas nyan par gyis/ /rgyal ba thams cad kyi mkhyen brtse gcig tu bsdus nas snyigs ma'i dus su gangs ri'i khrod 'dir mi'i gzugs su sprul te/ 'gro ba rnams kyi don mdzad pa'i bdag nyid chen po lha dang bcas pa'i 'jig rten na/ dkon mchog rgyal mtshan zhes mtshan yongs su grags pa de nyid kyi rnam par thar pa ngo mtshar chu rgyun zhes bya ba tshigs su bcad pa bdun cu pa zhig sngar rnam par spel ba las/ slar yang de nyid kyi don rnam par 'grel pa zhig gyis shig ces yul mchog la dad pa dang ldan pa dag gis bskul ba'i phyir na ngo mtshar rgya mtsho 'di 'bri ba la skyon med do/ /'di la gsum ste/ rtsom pa la 'jug pa klad kyi don/ brtsams par bya ba gzhung gi don/ rtsom pa mthar phyin pa mjug gi don to/ /dang po la mtshan gyi don/ mchod par brjod pa/ bshad par dam bca' ba dang gsum las/ dang po ni/ rje btsun bla ma dam pa mus pa chen po'i rnam par thar pa ngo mtshar chu rgyun zhes bya ba zhes pa ste/ rje btsun dam pa'i yon tan ma dros pa'i mtsho las byung zhing / mthong ba dang thos pa dag gis ngo mtshar gyi