[A:587]dpal bskyed la/ gdul bya rnams kyi dad pa'i rgya mtshor 'jug pa'i phyir na de skad ces bya'o/ /gnyis pa la/ lam ston pa po sangs rgyas la mchod par brjod pa/ dngos grub ster ba po bla ma nyid la mchod par brjod pa dang gnyis las/ dang po ni/ rgyal ba rdo rje 'chang la phyag 'tshal lo/ /zhes pa'o/ /gnyis pa ni/ dkon mchog mkhyen pa'i zhes sogs tshigs bcad gcig ste/ 'di'i mtshan gyi don mkhyen brtse nus pa gsum dang sbyar nas/ /de nyid kyang rigs gsum gyi rgyal ba gsum dang mtshungs par ston pa'o/ /nas zhes pa ni lhag ma 'dren pa'i tshig go /gsum pa ni/ skyes chen dam pa'i zhes sogs tshigs bcad gcig ste/ skyes bu chen po 'di nyid nges pa'i don du 'og min stug po bkod pa'i zhing khams su phyi dang nang gi mngon par byang chub pa'i tshul gyis mngon par rdzogs par sangs rgyas nas/ slar yang 'jig rten gyi khams gzhal du med pa na/ sprul pa dpag tu med pas sems can gyi don mdzad par nges pa'i phyir na rnam par thar pa ma lus pa ni sus kyang brjod par mi nus te/ tshad gzung du med pa'i phyir ro/ /de'i cha shas zhing 'dir skal ba mnyam pa'i gdul bya rnams la thun mong du snang ba rgya mtsho lta bu las dad pa'i blo gros kyi snyim pas bcus te/ bdag nyid kyang dam pa 'di lta bu las gdams pa 'di lta bu thob po snyam du yid tshim pa dang / gzhan dag la yang dad pa'i chu rgyun ma skyes pa skyed pa dang / skyes pa spel ba'i phyir du rang nyid kyis mthong ba dang / yid ches pa las thos pa dang / yang dag pa'i gtan tshigs las nges pa rnyed pa rnams brjod par bya'o zhes pa'i don to/ /gnyis pa la gsum ste/ yon tan rtogs pa'i ched du rnam thar brjod pa/ bsod nams spel ba'i ched du rgyun bshags bya ba/ 'bras bu 'grub pa'i ched du smon lam gdab pa'o/ /