[A:622]par bya'o/ /de yang sngar lha sar byon pa'i dus su dgung lo bdun cu thub pa'i mtshan ma byung gsungs pa dang / de rjes lan cig bdun cu don lnga thub pa'i mtshan ma byung gsungs pa dang / bla ma nam chos pa bde bar gshegs pa'i nub mo'i mnal lam dang bstun na/ bdun cu don bdun pa'i steng du bde ba can du gshegs rgyur snang na yang / brgyad cu gya gnyis sam/ 'dul ba pa'i lugs kyi gya gsum gyi bar du bzhugs pa ni grub pa'i dbang phyug rnams kyi man ngag bdud rtsi lta bu snyigs dus su mi nyams pa'i ched du sku tshe'i 'du byed byin gyis brlabs par snang ste/ dgung lo don gsum bzhes pa 'brug lo'i nang du dben gnas bsam gtan phug tu sku mtshams la bzhugs pa'i tshe/ mnal lam du/ chos rje kun dga' bzang po'i zhal nas/ oM ma Ni dha ri badzri ni swA hA/ zhes pa'i sngags gsungs nas 'di'i sngags 'bru'i grangs dang mnyam pa'i lo grangs thub ces pa'i lung bstan brnyes par mdzad pa las shes so/ /de nas don brgyad bzhes pa bya lo'i dbyar gling kha bde ba can du/ chos rje sku skye ba la sogs pa'i skal ldan 'ga' la gsung ngag dang / 'khor lo bde mchog gi bskyed rdzogs la sogs pa'i gdams pa mang po gnang nas de'i dgun po ngam rings su phebs te/ dge ba'i bshes gnyen nyis stong lhag pa la theg pa chen po'i blo sbyong la sogs pa'i gdams pa du ma gnang / de'i nang nas zab mo'i lam gyi skal ba dang ldan pa dgu brgya lhag pa la gsung ngag rin po che cha lag dang bcas pas smin par mdzad nas khyi lo sa ga zla ba'i nang du mus su phebs/ de nas bzung ste bde bar ma gshegs kyi bar bde ba can dang / bde ldan ri khrod dang / gle lung rnams su bzhugs nas/ bdag chen blo gros dbang phyug pa dang / sras kyi thu bo gung ru shes rab bzang po la sogs pa/ stod mnga' ris/ smad mdo khams/ bar dbus gtsang gi dge ba'i bshes gnyen mkhas btsun dad ldan dpag tu