[A:627]/ gnam gang gi bar bzhag kyang khyad gzhan ma byung nas/ na bza' g.yengs pa'i tshe lus gnad zhabs gnyis sems dpa'i skyil krung la/ pus mo gnyis g.yon phyogs su cung zad bsnol/ rting pa gnyis kyi steng du 'phongs kyi snag po che bzhag /phyag g.yas pa rdo rje khu tshur gyis mchan khung g.yon nas 'khyud/ g.yon pa sdig mdzub dang bcas te/ de'i steng nas dpung pa g.yas la 'khyud/ sgal tshigs drang por bsrang ba/ rgya gar gyi grub chen a wa dhU tI'i bzhugs stangs su 'dug zer/ rnam par thar pa 'di las dpags na/ thugs bzhed bzhin sgrub pa mdzad pa byung na sku lus ma spangs par mchog gi dngos grub brnyes par zhal gyis bzhes 'dug cing / 'on kyang thog ma med pa nas lus ji snyed cig blangs kyang / da lan gyi lus 'di las don che ba ma byung zhes gsungs pa'i shugs kyis bar dor phyag chen mchog gi dngos grub brnyes pa gdon mi za bar snang ngo / /bde bar gshegs khar sku lus la mtshan dpe cha mthun byung ba 'di ni/ chos rje sa skya paNDi ta bde bar gshegs khar ling chu rtser tho rangs shig dbus su rje btsun chen po/ g.yas su birWa pa/ g.yon du nag po pa byon pa gzigs te/ rje btsun gyi zhal nas skye ba gsum pa la de bzhin gshegs pa dri ma med pa'i dpal du 'gyur bar lung bstan/ birWa pa dang nag po pa gnyis kyis mthun 'gyur mdzad/ birWa pas thod pa'i bdud rtsi la srin lag gis reg par mdzad de/ khyed kyi ljags rkyong gsungs nas ljags la thig le byas pa'i snang ba byung bas/ de'i tshe rtog pa dang rtog med mtha' las 'das pa bde gsal mi rtog pa'i ye shes/ rgyal ba rnams kyi thugs brgyud la yang / 'di las lhag pa med snyam pa 'khrungs/ de'i tshe gsang ba'i gnas sbubs su nub pa dang / dbu'i gtsug tor blta bar mi mngon pa sogs mtshan dpe rnams brnyes gsungs pa dang mthun par 'dug go/ //