[A:492]rnying dam chos mtha' dag la/ /thos bsam sgom pas 'khrul med thugs su chud/ /rtsod dus kun mkhyen gnyis par gsol ba 'debs/ /zhes byung la/ tsa ri rdor 'dzin pa chos kyi mgon po'am mthu mkhan rgya bor grags pa la chos skyong gi skor gsan pa kho rang gi rnam thar du 'dug pa dang thams cad mkhyen pa bsod nams rgya mtshor chos 'brel gsan pa gnyis gsol 'debs su 'tshems pa zhig yin par mngon/
bla mar rlom pa la la dag ni rigs rus skye brgyud stobs 'byor gos sogs kyi khengs pas chos 'tshol ba la bag tsha ba'i gnas su byed cing cung zad don du gnyer ba'ang / sdom gsum las/ rta dang nor bu la sogs pa/ /cung zad tsam gyi nyo tshong la/ /kun la 'dri zhing brtags nas spyod/ /tshe 'di'i bya ba cung zad la'ang / /de 'dra'i 'bad pa byed pa mthong / /skye ba gtan gyi legs nyes ni/ /dam pa'i chos la rag las kyang / /chos 'di khyi yi zas bzhin du/ /bzang ngan gang du'ang mi dpyod par/ /gang phrad de la gus par 'dzin/ /nyin gcig gi ni skyel ma 'am/ /tshe gcig gi ni gnyen 'brel la'ang / /'bad de brtags nas len pa mthong / /deng nas brtsams te rdzogs pa yi/ /sangs rgyas ma thob bar gyi don/ /bla ma mchog la rag las mod/ /'on kyang rtogs dpyod mi byed par/ /tshong 'dus ngan pa'i zong bzhin du/ /su phrad rnams las len pa mthong / /kye ma snyigs ma'i dus 'di mtshar/ /zhes chos khungs btsun mi btsun sogs la mi blta bar bla chen du ming btags pa zhig 'gangs che'o snyam pa'i blun dad