[A:122]gnas shing kun tu rgyas gyur nas/ /kun bzang mchod sprin ji bzhin mchod par shog /bsam pa'i don rnams chos bzhin 'grub pa dang / /thub pa'i dgongs pa ma lus gsal ba dang / /snyan brgyud legs bshad skal bzang kun la sgrog /bshad sgrub bya bas nyin mtshan 'da' bar shog /de tshe gegs dang bar chad ma lus pa/ /bstan srung rgya mtsho 'khor dang bcas rnams kyis/ /g.yel med srung zhing mthun rkyen kun grub nas/ /ma lus bdud dpung tshogs rnams tshar gcod shog /brtse chen bla ma rnams kyi byin rlabs dang / /gsang chen rgyud sde zab mo'i bden tshig gis/ /rlabs chen smon lam 'grub pa'i 'bras bu yis/ /thub bstan dar rgyas 'phel ba'i bkra shis shog /ces dus gsum sangs rgyas thams cad kyi ngo bo mkhas grub kun gyi gtsug rgyan rje btsun dam pa 'di nyid kyi rnam thar mtha' dag ni so so skye bo'i spyod yul ma yin pas brjod par su yis nus/ khyad par bdag lta bu blo gros chung zhing sbyangs pa zhan la brjed ngas pa/ cung zad sbyangs pa yang dben pa snying dbus su bcug pa'i nyams len phran bu las gzhung lugs rgya chen po la ma sbyangs shing / sgra snyan ngag sogs kyis dben zhing / spobs pa ma mchis pa bdag gis ga la nus/ zhal slob mkhas pa dang grub pa dag gis mdzad pa'i 'os su 'dug kyang / grub pa mthong thos shig ma byung bas rgya mtsho chen po las chu thigs tsam bkod pa 'di/ zhabs phyir rgyun rings pas rgyus che ba'i dbang du byas nas gsung ngag rin po ches gtsos pa'i rnyed par dka' ba'i zab pa dang rgya che ba'i dam pa'i chos rnams kyi brgyud pa'i kha skong du med kha med du 'dug pa nas myur bar dgos rgyu yin 'dug kyang / snyom las su lus pa las dge ba'i bshes gnyen mang po dang / nye bar len pa'i rkyen grub rgyal nas sde pa tshe dbang grags pas bskul