།སྒྲུབ་རྙིང་སློབ་དཔོན་འཇམ་དབྱངས་རྒྱལ་མཚན། །གོང་དཀར་ཆོས་སྡེའི་ཟུར་འཆད་པ་དཔྱོད་ལྡན་འཕྲིན་ལས་རྣམ་རྒྱལ་སོགས་འགའ་ཞིག་ལ་དཔྱད་ཅིང་གསན་ཡིག་དང་དམ་པ་གཞན་གྱི་རྣམ་ཐར་ལོ་རྒྱུས། དུས་དང་ལོ་ཟླ་ལུང་རིགས་ཀྱིས་བསྒྲུབ་ནུས་པ་དང་ལ་ལར་རུང་མཐུན་ཀྱང་འགའ་ཞིག་སྦྱར་བའི་གོ་རིམ་བསྒྲིགས་པར་སོ་སྐྱེའི་སྣང་ལ་མ་ངེས་ཀྱི་འཁྲུལ་བར་ཚད་བཟུང་དཀའ་ནའང་ཕྱོགས་འགྲོ་ཙམ་ལ་ཡིད་བརྟན་དུ་རུང་བའི་ལུགས་སུ་བགྱིས་ཏེ་རྟོགས་བརྗོད་ཀྱི་རིམ་པ་ཆེར་ལོང་ཙམ་བཤད་ཟིན་ཏོ། །བློ་ཆེན་མེས་པོས་རིག་བྱེད་གཏམ་གྱི་སྦྱོར་བ་མ་ལུས་གཅིག་ཏུ་བསྡུས། །དབྱངས་ཅན་ལྷ་མོ་མགྲིན་པར་བྱོན་ཏེ་བརྗོད་པ་རྣམ་དག་ཚིག་འཕྲེང་སྤེལ། །བརྟན་པའི་འཁོར་ལོས་གསང་གསུམ་མི་ཟད་ཡོན་ཏན་བང་མཛོད་སྒོ་ཕྱེ་ནས། །བླ་མ་མཆོག་གི་རྟོག་པ་བརྗོད་ལས་བདག་འདྲའི་བློ་གྲོས་མཐུ་ཡིས་ཅི། །ལྷ་ལམ་གསེར་ལྡན་རི་བོ་མཐོན་པོའི་ཁྱོན། །རབ་ཕྲ་བུག་པའི་ནང་ནས་ལྟ་བ་བཞིན། །འཕགས་ཆེན་དམ་པའི་རྣམ་ཐར་ཆེས་བརླིང་ཡང༌། །རང་བློ་དང་འཚམ་བརྗོད་ལ་ཀླན་ཀ་སུ། །ཟས་གཙང་སྲས་ཀྱི་བརྒྱ་ཕྲག་མཛད་པ་ལ། །བསྔགས་པའི་དཔལ་ལྡན་མ་ཁོལ་བསོད་ནམས་ཀྱིས། །ཕུང་པོ་སྲིད་རྩེར་འཕྱུར་དེས་ཡིད་དྲངས་ནས། །ངལ་བའི་དཀའ་ཐུབ་ལེན་ལ་གཅིག་ཏུ་སྤྲོ། །རྒྱལ་སྲས་སྤྱོད་པའི་སྤངས་རྟོགས་མཚོ་ལྟར་ཟབ། །ལྡུགས་སྣོད་ཚིག་དོན་ཨ་མྲའི་ཚིག་གུ་ཙམ། །ཁོ་བོའི་བློ་གྲོས་ཀུ་ཤའི་རྩེ་བཞིན་ཕྲ། །དེ་ཕྱིར་མ་རྟོགས་འཁྲུལ་པས་ནོངས་ཀུན་འཆགས། །དེ་ལྟར་ན་ཡང་རྗེ་བཙུན་བཀའ་འགྱུར་བའི། །མཛད་པའི་ཆ་ཤས་མཐོང་བའི་ཤིང་རྟ་ཡིས། །མི་ཕྱེད་དད་པའི་ནོར་གྱི་དཔྱ་དྲངས་ཚེ། །སྲིད་ཞིའི་དབུལ་ཕོངས་གདུང་བ་ཕ་མཐར་བྱེད། །འདི་ལ་སྒོ་གསུམ་འབད་ཆེད་ངལ་བསྟེན་ཚོགས། །མགོན་པོ་ཁྱོད་ཀྱི་དཔལ་ཆེན་ཧེ་རུ་ཀའི། །གྲོང་དུ་ཉེར་ཁྲིད་ཁ་སྦྱོར་བདུན་ལྡན་སྐུ། །རིང་པོར་མི་ཐོགས་འགྲུབ་པར་བདག་བྱིན་རློབས། །སྤྱི་དང་ཁྱད་པར་ཚར་ཆེན་ཡབ་སྲས་ཀྱི། །སྙན་བརྒྱུད་ཚད་མ་བཞི་ལྡན་རིང་ལུགས་བསྟན། །མ་ཕམ་དབུས་འགྱུར་འཆང་དུ་འབྱོན་མིན་པར། །ཐོས་བསམ་བསྒོམ་པ་དར་ཞིང་རྒྱས་གྱུར་ཅིག །དེ་ལྟར་འ་ཞ་རྒྱལ་པོའི་གདུང་ལས་བཀའ་དྲིན་མཚུངས་པ་མ་མཆིས་པའི་དཔལ་ལྡན་བླ་མ་དམ་པ་ཁྱབ་བདག་རྡོ་རྗེ་སེམས་དཔའི་ངོ་བོ་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོའི་རྣམ་ཐར་དད་པའི་རླབས་ཕྲེང་འདི་ནི་རྡོ་རྗེ་འཆང་ཆེན་པོ་མཁན་ཆེན་ཞ་ལུ་པ་རིན་ཆེན་བསོད་ནམས་མཆོག་གྲུབ་ཀྱིས་རིང་པོ་ཞིག་ནས་བཀའ་གནང་ཞིང་དབོན་མཁྱེན་རབ་རྣམ་རྒྱལ་དང་མཁྱེན་རབ་བློ་ལྡན་གཉིས་ཀྱིས་རེག་ཟིག་དང་བཅས་སྔ་མོ་ནས་བསྐུལ་བ་དང༌། རྡོ་རྗེ་བྲ་ནས་རིག་འཛིན་སྤྲུལ་པའི་སྐུ་མཆོག་སོགས་དད་འདུན་ཅན་དུ་མས་མཚམས་སྦྱར་བ་ལྟར་འདུན་པ་རྩེ་གཅིག་པ་ཡོད་ནའང་ཁོ་བོ་དོན་མེད་རྣམ་གཡེང་གི་ཡང་བྲན་དུ་གྱུར་པས་མོས་པ་ལམ་བྱེད་དུ་སོང་བ་ཉེ་ལམ་རྡོ་རྗེ་འཆང་མཁྱེན་རབ་རིན་པོ་ཆེའི་དབོན་རིགས་རྒྱུད་སྡེ་རྒྱ་མཚོའི་མངའ་བདག་བཅོ་བརྒྱད་ཆོས་རྗེ་བྱམས་པ་ངག་དབང་ལྷུན་གྲུབ། ཁྱབ་བདག་བཀའ་འགྱུར་བ་ཆེན་པོའི་དབོན་རིན་པོ་ཆེ་ནམ་མཁའ་བསོད་ནམས་དབང་གི་རྒྱལ་པོ། གྲུབ་པའི་དབང་ཕྱུག་ལྕགས་ཟམ་པ་ཆེན་པོའི་གདུང་རིགས་རྗེས་དྲུང་ངག་དབང་བསྟན་འཛིན་ཕུན་ཚོགས་གསུམ་གྱིས་ཐོག་དྲངས་སྐལ་ལྡན་གྱི་གདུལ་བྱ་ཉི་ཤུ་སྐོར་ལ་ཞྭ་ལུ་མཁན་ཆེན་ཀུན་སྤངས་པ་ཆེན་པོས་སྐྱིད་ཤོད་དོགས་བདེ་ལྷོ་མོས་གཞིས་ཀར་མདོ་རྒྱུད་རྒྱ་མཚོའི་ཡང་སྙིང་ངེས་དོན་སྙིང་པོའི་དམ་ཆོས་གསུང་ངག་སློབ་བཤད་རིན་པོ་ཆེ་རྫོགས་པར་སྩལ་བའི་ཚེ་དཔོན་སློབ་གསུམ་གྱིས་བླ་མ་བརྒྱུད་པའི་ཁ་སྐོང་དུ་ཅིས་ཀྱང་རྩོམས་ཤིག་པར་གསུང་གིས་བསྐུལ་བ་ལ་བརྟེན་ནས་སློབ་བཤད་འཛིན་པའི་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་ཨཱ་ན་ལ་ཞེས་པ་མེ་འབྲུག་ནག་པ་ཟླ་བའི་ཚེས་བཅུ་བདུན་ལྷག་པ་ལྷ་མཚམས་ཀྱི་འགྲུབ་སྦྱོར་ནས་དབུ་བཙུགས་ནའང་ཟིན་བྲིས་ལ་དོགས་གནས་མང་བའི་ཕྱོགས་ཀུན་ཏུ་དྲི་མོལ་གྱི་སྒུགས་སྡོད་ལ་བརྟེན་དལ་འགྲོས་ཀྱི་ངོས་སྣྲོན་གྱི་ཟླ་བའི་ཡར་ངོའི་ཚེས་གཉིས་རྡོ་རྗེ་འཆང་དབང་ཕྱུག་རབ་བརྟན་གྱི་དུས་དྲན་གྱི་ཉིན་རྒྱལ་ཁབ་ཆེན་པོ་དམར་པོ་རིར་སྦྱར་བའི་ཡི་གེ་པ་ནི་གནས་བརྟན་རིག་པ་འཛིན་པ་འཇམ་དབྱངས་གྲགས་པས་བགྱིས་པ་སློབ་བཤད་ཟབ་མོའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པ་གྱུར་ཅིག