mkha' ngos la/ /sna tshogs 'ja' sprin 'od dra'i ri mo'i mdangs/ /legs bris bkod pa bskrun pa'i sgyu ma yis/ /rjes 'jug mya ngan gdung ma gzhil lam ci/ /'on te ganggA'i klung gi rdul snyed kyis/ /bgrang bar nus min dag pa'i zhing khams su/ /mtha' klas sprul pa ston pa'i thugs rje'i spyan/ /bdag sogs gdul byar gzigs tshe yid dbang spro/ /tshogs gnyis nyal 'gro'i phung po'i chu gter la/ /dge ba'i klung gis gang bar ltos min kyang / /rjes 'brang legs byas zhing gi so nam du/ /'dzad med rnam dkar char rgyun chal chil phob/ /rigs brgya'i khyab bdag rje btsun zha lu pas/ /dus dgra 'jam dpal dmar po lha lnga dang / /sku gdung rin chen dbang gi rgyal po gnyis/ /dbyer med ngo mtshar mchod pa de rmad byung / /de ltar dus gsum rgyal ba thams cad kyi spyi gzugs bka' drin mtshungs med dpal ldan bla ma dam pa khyab bdag rdo rje sems dpa' dang gnyis su med pa gang gi rnam par thar pa ches phra ba ni spyan dang mngon par shes pa la chags thogs med pa rnams ma gtogs 'jig rten gyi byed po tshangs pa lta bus kyang brjod par mi nus na gzhan dag gis lta ga la zhig thun mong ba'i gdul bya'i spyod yul du gyur pa'i mdzad pa rags pa'i lo zla tshes grangs yul dang gnas sogs rjes 'jug rnams le lo'i mal du 'du 'dzi'i gnyid la g.yur bas zhib par ma rtogs kyang rgyus yod kyi tho thor bu dang yid gnyis su gyur pa mang dag khyab bdag mkhan chen zha lu pa chen po/ /sgrub rnying slob dpon 'jam dbyangs rgyal mtshan/ /gong dkar chos sde'i zur 'chad pa dpyod ldan 'phrin las rnam rgyal sogs 'ga' zhig la dpyad cing gsan yig dang dam pa gzhan gyi rnam thar lo rgyus/ dus dang lo zla lung rigs kyis bsgrub nus pa dang la lar rung mthun kyang 'ga' zhig sbyar ba'i go rim bsgrigs par so skye'i snang la ma nges kyi 'khrul bar tshad bzung dka' na'ang phyogs 'gro tsam la yid brtan du rung ba'i lugs su bgyis te rtogs brjod kyi rim pa cher long tsam bshad zin to/ /blo chen mes pos rig byed gtam gyi sbyor ba ma lus gcig tu bsdus/ /dbyangs can lha mo mgrin par byon te brjod pa rnam dag tshig 'phreng spel/ /brtan pa'i 'khor los gsang gsum mi zad yon tan bang mdzod sgo phye nas/ /bla ma mchog gi rtog pa brjod las bdag 'dra'i blo gros mthu yis ci/ /lha lam gser ldan ri bo mthon po'i khyon/ /rab phra bug pa'i nang nas lta ba bzhin/ /'phags chen dam pa'i rnam thar ches brling yang / /rang blo dang 'tsham brjod la klan ka su/ /zas gtsang sras kyi brgya phrag mdzad pa la/ /bsngags pa'i dpal ldan ma khol bsod nams kyis/ /phung po srid rtser 'phyur des yid drangs nas/ /ngal ba'i dka' thub len la gcig tu spro/ /rgyal sras spyod pa'i spangs rtogs mtsho ltar zab/ /ldugs snod tshig don a mra'i tshig gu tsam/ /kho bo'i blo gros ku sha'i rtse bzhin phra/ /de phyir ma rtogs 'khrul pas nongs kun 'chags/ /de ltar na yang rje btsun bka' 'gyur ba'i/ /mdzad pa'i cha shas mthong ba'i shing rta yis/ /mi phyed dad pa'i nor gyi dpya drangs tshe/ /srid zhi'i dbul phongs gdung ba pha mthar byed/ /'di la sgo gsum 'bad ched ngal bsten tshogs/ /mgon po khyod kyi dpal chen he ru ka'i/ /grong du nyer khrid kha sbyor bdun ldan sku/