[A:146]mun nag tu/ /'khyams tshe skye ba'i zla ba shar/ /rtag pa'i snang ba la zhen tshe/ /gzugs sku nub kyi ri rtser phyogs/ /kye ma 'jig rten gsum gyi mgon/ /bdud rtsi las kyang rnyed dka' ba/ /'gro 'di'i bsod nams lag pa yis/ /ma zin zhing khams gzhan du bzhud/ /kye ma bstan pa'i srog shing chag /thar lam ston pa'i nyi ma nub/ /nyon mongs sreg pa'i me chen shi /phan bde'i dpag bsam ljon pa 'gyel/ /de mthong dam ye mi phyed pa'i/ /rgyal ba gnyis pa'i sku brnyan gyi/ /spyan las mya ngan chu thigs kyi/ /dog pa mu tig 'od can babs/ /de sogs zhing 'dir thugs brtse ba'i/ /rgyal kun skyo ba'i tshul bzhed na/ /yid can rnams kyi snying 'di ni/ /dum bur mi 'gas rdo rje'am ci/ /'on kyang 'phags rnams spros bral gyi/ /zhi ba'i dbyings su rab gzims kyang / /'bad med lhun gyis grub pa yi/ /'gro don chu bzhin rgyun mi 'chad/ /de slad rtse gcig dad pa yis/ /gsol 'debs padmo dgod byas na/ /byin rlabs sbrang rtsi'i dog pa ni/ /rtag tu stsol bar gdon mi za/ /mgon de'i thugs dgongs rdzogs pa'i slad/ /rnal 'byor bdud rtsis rtag myos shing / /'jam dpal dbyangs dang dbyer med des/ /kun tu bzang po'i spyod pa bskyangs/ /gtong phod dam pa'i chu gter gyis/ /tshogs gnyis me tog skyed bsrings bas/ /chos kyi sku yang rab dgyes pa/ /nyi mas padmo bzhin du byas// //de ltar dzambu'i rkang 'thung gis nye bar mtshan pa'i ljongs 'dir thub bstan ku mu dA'i tshal bzhad pa dang / 'gro ba rnams kyi rab rib thams cad dbrog pa'i slad du bsam bzhin du sku'i skye ba bzhes pa 'dren mchog smra ba'i zla ba mkhan chen nam mkha'i mtshan can gyi rnam par thar pa so skye'i blo yul du gyur pa rnams legs par bkod zin to// //slar smras pa/ mdzes mdzes mkhyen pa'i