[A:147]lang tsho dar babs mdzes mdzes mkhas mang dbus na rab mdzes mdzes/ /mdzes mdzes nyams rtogs nor bu'i rgyan ldan mdzes mdzes grub pa'i gtsug tu nyer mdzes mdzes/ /mdzes mdzes phrin las rmad du byung bas mdzes mdzes thub bstan rgyas par mdzad mdzes mdzes/ /mdzes mdzes dpal ldan bla ma mchog der mdzes mdzes spyi bos lan brgyar mchod mdzes mdzes/ /gang gi yon tan zab cing rgya che ba/ /rgya mtsho'i klong dang lha yi lam gyis kyang / /gzhal bar nus min de phyir rgyal rnams las/ /gzhan pa'i sems kyis phyogs re'ang rtogs par dka'/ /'on kyang cung zad tsam zhig bsnyad pas kyang / /dkar min las kyi smag rum gzhil ba dang / /tshogs gnyis snang ba ches cher rgyas 'gyur zhes/ /gtam 'di rna ba'i bcud du son pa'i mod/ /yid 'ong dad pa'i sems kyi lag pa yis/ /yid 'ong yon tan me tog gang rnyed pa/ /yid 'ong snyan pa'i srad bu la brgyus 'di/ /yid 'ong dal 'byor don dang ldan phyir byas/ /kwa ye blo gros zla 'od ltar gsal zhing / /thar pa 'dod pa'i bzhin ras mdzes pa dag /gus pas pir gyis 'di yi rnam thar rnams/ /snying la bris dang byin rlabs 'jug par nges/ /'di ltar bgyis pa'i dge ba dri med kai lA sha ltar dkar ba des/ /nam mkha' dang mtshungs pha mtha' mi mngon yid can rgya mtsho'i tshogs rnams kyi/ /sdug bsngal rgyu bcas dus mtha'i me yis bud shing lta bur rab bcom ste/ /dpag bsam shing bzhin 'dod dgu sbyin mkhas 'chi med rgyal ba'i sa thob shog/ //dpal ldan bla ma dam pa gsum gyi rtogs pa brjod pa ngo mtshar me tog g.yo ba'i 'khri shing byin rlabs 'dod dgu'i 'byung gnas las/ /mkhan chen thams cad mkhyen pa byams pa nam mkha' 'chi med bkra shis grags pa'i rgyal mtshan dpal bzang po'i zhal snga nas kyi rtogs pa brjod pa'i yal 'dab ste dang po'o// //