[A:31]'jam pa'i dpal las chos gsan pa 'di ni skye bo phal cher la grags pa'i phyir bris pa yin mod kyi/ slar yang yid ches shing ngo mtshar ba'i lo rgyus gnyis shig yod mod kyi skabs ma yin pa'i phyir re zhig bstan par mi bya'o/ /de ltar gdul bya'i skye bo phal cher dang mthun par snang ba'i pha rol tu phyin pa drug dang ldan zhing lam rim pa gnyis kyis mdzes par byas nas bsdu ba'i dngos po bzhis sems can gyi don dgung lo drug cu rtsa bdun gyi bar du mdzad pa yin no/ /de nas yang rtag 'dzin can gyi sems can rnams gzhug pa'i phyir stag gi lo/ tha skar gyi zla ba dkar po'i tshes bcu bzhi'i tshe/ dpa' bo dang rnal 'byor ma'i tshogs kyis bsu nas skye bo thams cad kyi mthun par snang ba rol mo'i sgra dang / dri zhim po'i tshogs dang / gzha' 'od kyis gang bar byas nas sprul pa'i sku bzhi'i rnam pas gcig ni bde ba can du gshegs/ gnyis pa ni po ta la'i ri'i rtse mor gshegs/ gsum pa ni uDyan du gshegs/ ngo bo nyid bzhi pa ni byang phyogs kyi 'jig rten gyi khams gser mdog can du gshegs so zhes spyan snga na gnas pa phal cher gyis gsal bar rtogs pa yin no/ /gang gi tshe pur zhugs la bzhen pa'i tshe spyan snga na bzhugs pa thams cad la yang yid mi bde ba med pa dang / ting nge 'dzin dang ldan zhing zhal bzhi par ni kun gyis legs par rtogs shing yid ches par mthong la/ kha cig gis ni zhal brgyad par mthong ngo zer ba'i gang zag gsum dang gtam gyi lo rgyus zhib tu byas so/ /lo rgyus rgya chen po dag bsgrags par ga la nus/ 'di tsam zhig bsgrags par byas so/ /gsang sngags 'dzin pa grags pa rgyal mtshan la/ /stag sde ri phug dgon pa'i dge slong mchog /rdo rje 'dzin pa byang chub shes rab kyis/ /mang du gsol ba btab pas gus par bris/ /de las byung ba'i dge ba gang thob pa/ /'gro ba 'di kun bla ma chen po yis/ /nges par bzung nas