[A:345]smra ba'i nyi ma mtshan brjod par dka' ba don gyi slad du mtshan nas smos na mkhan chen rdo rje 'chang byams pa kun dga' bstan 'dzin bkra shis grags pa'i rgyal mtshan dpal bzang po'i zhal snga nas kyi rnam par thar pa so skye'i blo'i spyod yul du gyur pa rnams re zhig bkod zin to/ /slar smras pa/ mkhas pas mkhas pa'i bdud rtsi'i zer gyis lung rtogs chu gter 'phel bgyid cing / /grub pas grub pa'i gtsug na rab 'dzegs mchog thun dngos grub sbyin mkhas pa/ /dran pas dran pa tsam gyi mod la srid zhi'i mun pa kun sel ba/ /bla ma'i bla ma thams cad gzigs der slar yang gus pas phyag bgyi'o/ /gang de'i gsang gsum me long gcig nyid du/ /sras bcas rgyal kun tshud pa'i ngo mtshar gtam/ /mtha' dag brjod la 'jam dpal dpa' bo yis/ /dbyangs can grogs su sbran yang zad pa med/ /'on kyang dngos grub rtsa ba bla ma ru/ /shes pa'i blo yis cha tsam bsnyad pa 'dis/ /mdzub mos nam mkha' bstan pa ji bzhin du/ /yon tan bsam mi khyab tsam rtogs par byed/ /grogs dag las nyon rab rib cher rgyas pa'i/ /mun pa'i khang bu dag las phyir thon te/ /rnam par thar pa 'di la ltos shig dang / /srid pas byas pa'i 'jigs pa 'jil bar byed/ /'dir 'bad dge ba nyin mor byed pa'i gzis/ /'gro ba'i las nyon mun pa kun bsal te/ /yang dag snang ba dam pas 'jig rten na/ /phan bde'i dga' ston ci yang 'jo bar shog /dpal ldan bla ma dam pa gsum gyi rtogs pa brjod pa ngo mtshar me tog g.yo ba'i 'khri shing byin rlabs 'dod dgu'i 'byung gnas las/ mkhan chen rdo rje 'chang byams pa kun dga' bstan 'dzin bkra shis grags pa'i rgyal mtshan dpal bzang po'i zhal snga nas kyi rtogs pa brjod pa'i yal 'dab ste gnyis pa'o// //