[A:149]byams dang snying rje'i sprin dkar g.yos pa las/ /'gro kun dga' byed sdom gsum nor bu'i char/ /phab pas bdag blo'i shing rta 'gengs mdzad pa/ /bstan 'dzin rgya mtsho'i gtsug rgyan phyag gi yul/ /e ma srid pa'i gdung ba kun sel zhing / /bde ba'i dpal skyed snang ba'i mchog sbyin pa/ /sngon med 'dren pa bdud rtsi'i 'byung gnas dang / /mtshungs pa 'jig rten 'dir ni byung bar gyur/ /de yi yon tan mtha' ni kun gsal gyis/ /rang lus sngon por ma song de srid du/ /btsal yang de yi nges pa ma rnyed rung / /da dung 'tshol ba'i ngal ba 'dzin pa 'dra/ /'on kyang nor bu'i gling nas ded dpon gyis/ /rin chen mtha' dag len par mi nus mod/ /cung zad res kyang 'dod rgu sbyin pa ltar/ /skal bzang dga' ba bskyed phyir cha tsam brjod/ /spyi don gnyis pa dus gsum gyi rgyal ba sras dang bcas pa rnams kyi gsang gsum gcig tu bsdus pa'i ngo bo/ /lha dang bcas pa'i 'jig rten thams cad kyi ral pa'i thor tshugs indra nI la'i mdog lta bus lan cig ma yin par yang nas yang du btud pa'i skyabs kyi mchog tu gyur pa/ shes bya'i chos thams cad la thogs pa med pa'i mkhyen rab kyi dkyil 'khor rab tu rgyas pa/ 'gro ba rnams la rjes su chags pa'i snying rje'i 'od zer ring por 'phro ba/ sgrib gnyis kyi mun pa stug po thams cad yongs su 'jil ba/ 'khor ba'i chu gter mtha' dag skem par byed pa/ mngon mtho dang nges legs kyi lam gsal bar byed pa/ gsol ba btab na mchog dang thun mong gi dngos grub kyi snang ba bde blag tu ster bar byed pa/ dpal ldan bla ma dam pa 'dren mchog smra ba'i nyi ma mtshan brjod par dka' ba/ don gyi slad du mtshan nas smos na/ dpal e waM chos ldan gyi mkhan rabs zhe drug pa mkhan chen rdo rje 'chang byams pa kun dga' bstan 'dzin