[A:677]ji srid bstan pa'i sgron me 'bar gyur pa/ /de srid ngo mtshar gtam gyi rna rgyan 'dis/ /'jig rten gsum por mdzes pa sbyin gyur cig /bkra shis gang zhig gtsug gi nor bur bla ma'i zhabs sen 'bral ba med/ /bskal mang rnyed dka' gsung gi bdud rtsis snying la sim pa thob gyur cing / /bde stong gnyis med ye shes chen po rtag tu rol pa'i dga' ston gyi/ /bkra shis snang bas srid zhi'i khyon kun yongs su khyab pa nyid gyur cig /bcu phrag rig pa'i mthar son mkhas pa'i rje/ /sdom gsum dri mas ma gos btsun pa'i mchog /rim gnyis las byung 'od gsal mngon du gyur/ /'jam dbyangs shes rab rgya mtshor gsol ba 'debs/ /zhes mkhan chen rdo rje 'chang byams pa kun dga' bstan pa'i rgyal mtshan dpal bzang po'i rnam par thar pa yon tan mtha' yas pa'i rgya mtsho dngos grub kyi rba rlabs rnam par g.yo ba zhes bya ba 'di'ang / rje rdo rje 'chang de nyid gzugs sku mkha' 'gro'i grong khyer du bsdu ba'i tshul bstan pa'i phyis lo lcags lug gi lor rgyal ba'i rgyal tshab chen po mkhan chen rdo rje 'chang ngag gi dbang phyug 'jam dbyangs rin chen rdo rje'i zhal snga nas bkra shis pa'i lha rdzas dang / rin chen dang po'i gnang skyes gya nom pa dang bcas rje rin po che'i rtogs brjod 'di lta bu zhig bris shig ces bka'i phreng ba gtsug gi rgyan du stsal ba ltar bdag cag gi mnyam med a tsArya chen po bcu phrag rig pa'i ma hA paNDi ta dpon slob 'jam pa'i dbyangs shes rab rgya mtshos brjod bya'i don zab cing / dpyad gsum gyis rig pas grub pas thar 'dod rnams kyi snying la dad gsum me tog gsar du bzhad cing / sdeb legs tshig gis mkhas