[A:༣༨༧]དབྱངས་ཆོས་ཀྱི་བློ་གྲོས་ཀྱི་ཞལ་སྔ་ནས་ལྷ་རེག་རིན་ཆེན་གཉིས་པའི་རྟེན་དང་བཅས་སྔ་ཕྱི་དུ་མར་བསྐུལ་མ་གནང་བའི་བཀའ་ལུང་གསེར་གྱི་ཅོད་པན་སྤྱི་བོར་བཅིངས་ཏེ། རྗེ་བླ་མ་རྡོ་རྗེ་འཆང་དེ་ཉིད་ཀྱི་ཞབས་པད་ཡུན་རིང་དུ་བསྟེན་པས་རྣམ་པར་ཐར་པ་ལ་མི་འཕྲོག་པའི་དད་པ་ཐོབ་པ་ཤཱཀྱའི་དགེ་སློང་འཇམ་དབྱངས་ཀུན་དགའ་བསྟན་པའི་རྒྱལ་མཚན་གྱིས་རྗེ་ཉིད་ཀྱི་ཞལ་གསུང་མ་སོར་བཞག་བྱས་ཤིང༌། རང་གི་དྲན་ལམ་ན་ཡོད་པ་སྒྲོ་སྐུར་དང་བྲལ་བ་རྣམས་ཀྱིས་ཁ་བསྐངས་ཏེ། ས་བཅད་དང༌། ཚིག་གི་སྙན་ཆ་དང༌། ལུང་སྦྱོར་སོགས་བཏང་སྙོམས་སུ་བྱས་ཏེ། མགོན་པོ་གང་གི་སློབ་མ་རྣམས་ཀྱི་དད་པའི་གསལ་འདེབས་སུ་ཆུ་རྟ་ལོ་ཁྲུམས་སྟོད་ཟླ་བའི་ཚེས་དགེ་བར་རྫོང་གསར་བཀྲ་ཤིས་ལྷ་རྩེར་གྲུབ་པར་བགྱིས་པ་འདིས་ཀྱང་བདག་སོགས་ལྟོས་བཅས་ཐམས་ཅད་དཔལ་ལྡན་བླ་མ་དམ་པས་ཚེ་རབས་ཐམས་ཅད་དུ་རྗེས་སུ་འཛིན་པའི་རྒྱུར་གྱུར་ཅིག། །།དགེའོ།། །།ཨོཾ་སྭ་སྟི། འཇམ་མགོན་བླ་མའི་རྣམ་པར་ཐར། །སྤར་དུ་བསྐྲུན་པའི་ལེགས་བྱས་མཐུས། །འབྲེལ་ཐོགས་གཙོར་བྱས་སེམས་ཅན་རྣམས། །བླ་མ་མཆོག་གིས་རྗེས་འཛིན་ཤོག། །།དགེའོ། །མངྒ་ལཾ།།