/ /rje btsun bla ma dpal e waM khang gsar mkhan chen ngag dbang blo gros gzhan phan snying po'i rnam thar mdor bsdus dad pa'i dbyangs snyan zhes bya ba bzhugs so/// /na mo gu ru bhyaH rgyal kun thugs rje'i chu gter las 'khrungs pa'i/ /sum ldan rdo rje 'dzin dbang yid bzhin nor/ /'gro la zab rgyas chos kyi 'dod rgu stsol/ /dpal ldan bla ma'i zhabs la mgos phyag 'tshal/ /zhes mchod par brjod nas/ rje btsun bla ma dam pa'i rnam par thar pa shin tu bsdus pa zhig gus pas 'bri bar bya'o/ /de yang bdag cag gi drin can rtsa ba'i bla ma dam pa rgyal ba rdo rje 'chang sum ldan ngur smrig 'chang ba'i skur snang ba dpal e waM khang gsar mkhan chen ngag dbang blo gros gzhan phan snying po ni/ grub brnyes sngags 'chang du ma byon pa'i gnubs kyi rigs khyad par can las gtsang rong sman thang du/ rab byung bco lnga pa'i me pho byi ba'i lor sku bltams/ ngor e waM chos ldan du khang gsar bla brang gi zhabs drung du mnga' gsol/ e waM pa'i phyag srol ltar kun tu dgos pa'i gzhung bdun sogs thugs 'dzin dang / cho ga'i phyag bzhes rnams la byang chub par mdzad/ khang gsar mkhan chen ngag dbang blo gros snying po las sdom pa gsum gyi bka' drin nos shing thugs kyi sras dam par gyur/ sku chung ngu nas nges 'byung dang byang chub kyi sems rin po che lhan skyes su mnga' ba'i stobs kyis mdzad spyod thams cad 'phags pa sa chen po la bzhugs pa'i rnam thar dang tshul mtshungs pa kun la gsal bas zhabs drung dam pa rin po che zhes de dus sa ngor gyi bstan 'dzin kun gyi dbus na rgyu skar gyi khrod du zla ba ltar mngon par 'phags par gyur/ rje 'di'i gsung rtsom thor bu'i gras shig na 'khrungs rabs gsol 'debs 'dra ba mdzad byang med par 'phro can lta bu zhig bzhugs pa 'di ltar/ dmigs med spros bral chos sku'i dkyil 'khor bzlums/ /bde chen longs sku'i zer brgya rab tu grol/ /'gag med sprul pa gdul bya padmo'i gnyen/ /spyan ras gzigs dbang sa gsum mgon du bsngags/ /rgyal rigs nyid las grub pa'i brtul zhugs 'chang / /mkha' 'gros rjes bzung mngon du gyur pa yi/ /rtogs pa brnyes shing bdud dang mu stegs kun/ /tshar gcod rjes 'dzin mdzad pa de la 'dud/ /gang zhig DA ki ma yis rjes bzung zhing / /tshe 'dir bde chen mchog gi dngos grub brnyes/ /gzugs sku ma spangs po tA la yi rir/ /dngos su gshegs mdzad ku ku ri par 'dud/ /mkhas grub bye pa'i dbus na gser ri bzhin/ /lham mer gsal ba Arya de ba'i sras/ /gangs can ljongs 'dir dam pa rgya gar grags/ /ka ma shI la de la snying nas 'dud/ /'jig rten dbang phyug thugs rje'i sgyu 'phrul las/ /'chi med gzhon nu'i sras su skur bstan pa/ /sa skya pa zhes srid na zla bral ba/ /kun dga' snying po de la bdag cag dad/ /snying rje'i rang gzugs dbang drag 'bar ba'i skur/ /yongs bzhengs snyigs dus 'gro 'dul sprul pa'i sku/ /brtson 'grus bzang po mtshan gsol lcags zam pa/ /thang stong rgyal pos tshe rabs rjes 'dzin gsol/ /zhes 'byung bas skyes chen de rnams kyi rnam sprul du nges pa rnyed/ sku na gzhon dus khang gsar bla brang 'byor pa shin tu phra bas khams phyogs su 'bul sdud la chibs bsgyur gnang dgos byung ste/ de dus rdzogs chen mkhan po gzhan