[A:111]pa la/ yang yang du bsnyad pas/ rgyal po'ang the tshom du gyur te/ mchod gnas rnams spyan drangs nas thams cad lha rten la phyag byed dgos zer bas/ gzhan rnams kyis phyag byas pas/ slob dpon brgyad stong pa'i pusti la phyag byed kyin 'dug pa la/ rgyal pos lha rten la phyag gyis byas pas/ ngas 'di la phyag byar mi btub ste/ lha 'dis nga'i phyag mi thub byas pas/ 'di 'dod pa'i khams na che ba yin pas/ phyag 'tshol zer/ de nas lha rten la rgyal po sdig can gcig gis bdag la phyag mi 'tshal ba'i dbang med pas/ lha khyod bzod pa bzhes shig /ces brjod nas thal mo g.yas dpral bar bzhag ste/ na mo buddhA ya/ zhes brjod pas lha rten gyi sum cha yan chad gas/ mgrin par bzhag nas/ na mo dharmA ya/ zhes brjod pas sum gnyis gas/ snying gar bzhag nas/ na mo sangghA ya/ zhes brjod pas thams cad gas/ phyogs bzhir phyag byas pas tshal pa bzhir gas so/ /de nas rgyal po 'khor dang bcas pa thams cad shin tu skrag par gyur nas zhabs la 'jus te/ slar gsol ba btab pas phyag gis lingga 'thor ba rnams bsdus te/ lha rten gyi spyi bor thugs rje chen po'i sku rdo las byas pa nag po zhig bzhag nas 'di la phyag dang / bskor ba dang / mchod pa gyis shig /gal te thugs rje chen po'i sku 'di bsal nas phyag dang mchod pa byas na lha rten 'jig par 'gyur ro zhes bsgos nas lho phyogs su gshegs pa dang / der bzhud pa'i dus su ral pa can rnams kyi gseb nas gcig phyir 'brangs pa ni nag po pa yin no/ /de nas bzhud pa'i lam na phyi rol pa'i lha rten yod pa thams