[A:14]ma byung / mkhan po stag 'brog gnyis kho na sdug bsran dang dpyad pa che bar dgongs nas gsung 'byon par zhal gyis bzhes te/ de dus so ka yin pas ston 'gro bar chas so/ /de'ang bla chen dang po nas brtson 'grus dang dpyad pa che bar yod pas a tsa ra byung ba kun la zas byin zhing 'phral skad bslabs pas phar gshegs tsa na 'phral skad la lo tsA ba 'jug mi dgos pa zhig mkhyen skad/ de nas mkhan slob kyis gser mang po bskur/ khyad par du slob dpon gyis ched gnyer cher mdzad de rgya gar du brdzongs so/ /de'i tshe zhal bkod gsum mdzad de/ bstan pa'i rtsa ba yin pas 'dul ba dang / bstan pa'i snying po yin pas phar phyin dang / bstan pa'i nying khu yin pas gsang sngags slobs la shog gsung nas bsgos so/ /de la chos rje'i zhal nas chos kyi babs go ba'i zhal ta yin te/ de'i rgyu mtshan yang 'dul ba bstan pa'i rtsa ba yin te/ tshul khrims dang ldan pa'i rab byung med na rnal 'byor pa ji lta bu bzang du re ba mang du yod kyang bstan pa rnal ma mi 'ong / phar phyin snying po yin te/ phar phyin med na theg pa chen po'i rtsa ba byang chub kyi sems dang sa lam la sogs pa'i rnam gzhag tsam yang mi phyed/ gsang sngags nying khu yin te/ phyi nang gi zab pa'i gnad thams cad nyams len du dril nas ston pas sngags la ma brten par mthar thug gi 'bras bu myur du mi 'thob pas so/ /zhes gsungs so/ /stag 'brog gis phar byon pa'i lam du bal por byon/ chu snyoms phyir lo gcig bzhugs te/ bha ro haM thung zhes kyang zer/ mtshan dngos shAnti bha dra/ bod skad du/ zhi ba bzang po zhes pa las bla chen gyis dbang bskur zhus nas rgyud sde