[A:18]thang dkar po bya ba na yod pa'i 'brog pas spyan drangs nas chos kyi nyan bshad mang po mdzad cing bzhugs pa'i dus na/ bla ma ga ya dha ras phrin btang nas/ paNDi ta 'ong gin yod pas bsu ru shog gsungs/ chos ci shes dris pas rdo rje theg pa la mkhas par dgongs nas dgyes te/ bsu ba la byon pa dang mang yul gyi la der mjal/ rim gyis gdan drangs nas byon pa dang gung thang mu gu dgon par 'brog mi khrag gi ral pa can bya ba'i slob ma rgyus can gyis 'brog mi'i zhen byas nas sna len byas te btegs pas/ dbyar zla ba gsum lo paN gnyis kyis chos mang du gsungs shing bzhugs so/ /de nas mar byon te gram pa lha rtse'i brag la zla ba drug tu bla ma lnga bcu pa'i sgo nas dpon slob gnyis kyi 'brel ba brtag cing chos kyi gsung gleng mdzad pas phan tshun gcig la gcig mnyes te/ paNDi tas lo lnga bzhugs nas gsung ngag rdzogs par gnang ba/ lo tsA bas gser srang lnga brgya phul ba/ de'i bar du mu gu lung du bzhugs pa'i chad mdzad nas mu gu lung du spyan drangs te/ chos kyi bshad nyan mdzad cing lo gsum song ba dang / paNDi tas rgya gar du 'gro gsungs/ der bla chen gyis bla mas lo lnga bzhugs par zhal gyis bzhes pa lags mod/ /bdag gis gser yang ma 'grub lags zhus pas/ chos thams cad ni legs par tshar/ khyod rang gser phris la phul gsung / bla ma 'brog mi'i dgongs pa la gser phri ru mi rung / tshang mar phul dgos dgongs nas/ gser bsgrubs pas srang brgya ma ldang bar/ shangs mda'i brag rgya bo la zur po che shAka 'byung bsod nams che yin yod pa de sngar gyi slob ma yin pas/ der phrin btang nas chos 'dod na sbyin gyi/ shog