[A:23] rgya dpe rnams 'bul bsam pa de res ma phul/ 'bum bcu bzhi dum gcig phul/ phyis khong gi sras po jo sras 'bar bas phul nas da lta sa skya na yod/ de'i dril bu yin zer ba zhig kyang rje pa ru mtshams su byon tsa na phyag tu byung nas da lta sa skya na yod/ jo bo'i rdo rje yin zer ba zhig kyang ru mtshams na sngags pa g.yung ston bya ba zhig la 'dug pa de rje la phul/ bdag la gur tshar gcig zhu zer bas/ ngas sa skya ma yin par bshad rgyud gnyen po 'di bshad mi nus gsungs nas ma gnang / de dang po rtsa rgyud dang bsdongs pa las rkyang par bshad na gnyan pa'i stobs kyis de'i 'phro la dge bshes grongs pa mang po byung gsung / phyis thugs 'gyod nas de tsam na yi ge brgya pa'i thun 'dra byas nas tshar gcig bshad de rdo rje de len pa yin pa la gsungs so//
! gsum pa bla ma chen po'i yon tan gyi khyad par ni/ de lta bu'i rje ga ya dha ra las gsung ngag rin po che'i mdzod brnyes pa'i rje mu gu lung pa de la yon tan gyi khyad par ci mnga' na/ spyir gnas lnga rig pa'i paNDi ta chen po yin/ bskyed pa'i rim pa la brtan pa thob ste lus gcig las gnyis su sprul pa dang / sbyin sreg gi thab las yo byad len nus/ rlung gi nus pas nam mkha' la skyil krung 'cha' ba dang / bsam na shes pa'i mngon shes yod/ 'pho ba'ang grong 'jug byed nus te/ sku 'da' khar nga'i ro 'di zhag bdun par ma sgul bar zhog /de nas nga'i rig pa phung po 'di nyid la zhugs nas lam gyi lhag ma rnams bgrod nas phyag rgya chen po mchog gi dngos grub 'thob par byed do gsungs pa la/ sras po ma smad rnams kyis gsung la ma nyan par tshos ltang gi me la phul lo/ /