[A:45]phan par gnubs yul rong nas mar phyin pas lha rje gnubs pa'i ban chung kha cig chu kha zhig na/ e ma ngo mtshar lnga bya ba dbyangs su gyer gyin 'dug ste/ e ma ngo mtshar rmad kyi chos/ /rdzogs pa'i sangs rgyas kun gyis gsungs/ /skye ba med las thams cad skyes/ /skyes tsam nyid nas skye ba med/ /ces zer ba thos nas/ de la nges shes khyad par can skye ba'i stobs kyis khams drag /de nas yang thur song ste dam pa la zhus pas rnga gcig lag tu gtad nas brdung bya ba'i brda zhig mdzad pa/ brdungs pas skad chen po zhig byung / gzhan ci'ang ma byung ste/ gdams ngag zhus pas song zhig zer ba'i brda mdzad/ des phan pa ma byung bas gdams ngag rdugs par thag bcad gsung / de dus bla ma se mkhar chung bas mdo mang bzhengs yod pa'i chos kyi glegs shing sgrub pa la brin du byon pa'i tshur lam ding ri shar phyogs kyi mkhar chung pa can du byon/ mkhar chung ba'i slob ma ding ri skye chag pa khyung po hU~M ka ra ba na re/ 'brog mi'i slob ma se kun rig bya ba lam 'bras kyi bdag po khams 'dus pa 'grol ba la shin tu mkhas pa zhig byon bdog pas nyid chos mi zhu'am zer te/ lcam sring gnyis kyis rta gcig la yo byad mang po bkal nas mjal du byon/ dang po nas khams kyi skyon 'di lta bu byung ba'i lo rgyus bla ma'i drung du phul bas/ khong lhwam 'bur ma zhig la sba lcag cig gis thug thug mdzad cing khyod la dang po 'di ltar ma byung ngam/ de nas 'di ltar ma byung ngam gsungs pas/ zha ma'i nyams la byung ba tsho dang mthun nas/ rje sangs rgyas zer ba de khyed lags sam zer zhing shin tu yid ches shing phyag mang po btsal/