[A:61]mchog rgyal po bla ma se'i slob dpon yin pas brgyud pa'i dam tshig la dgongs nas gsung ngag rin po che ma lus pa gnang ngo / /mdor na lam skor dgu/ phra mo nyi shu rtsa brgyad/ kye rdo rje'i rgyud rkyang gi bshad pa/ gsang ba 'dus pa/ mnyam sbyor la sogs pa rgyud sde de dag dang gdams ngag mang po lo bzhi bzhugs nas gnang ngo / /gdams ngag rdzogs te sgrub pa lung sbyin pa'i dus su lo bco brgyad kyi bar du chos 'di gzhan la ston pa lta zhog /'di 'dra yod pa dang shes pa'i ming tsam yang ma 'dogs/ yi ger ma 'bri/ de nas gzhan la 'chad dam/ yi ger 'bri'am gang byed kyang khyod rang chos kyi bdag po yin gsungs nas bka' rgyas btab/ spyir khyod kyis sgrub pa gtso bor byas na tshe 'di nyid la phyag rgya chen po mchog gi dngos grub thob/ nyan bshad byas na gdul bya dpag tu med pa'i don du 'gyur zhing / khyad par du lus ma spangs par phyag rgya chen po mchog gi grub pa thob pa'i slob ma gsum/ bzod pa thob pa'i rnal 'byor pa bdun/ rtogs pa dang ldan pa'i rnal 'byor pa brgyad cu tsam 'byung zhes lung bstan no/ /der bla mas lo bco brgyad du bsnyel gyis dogs nas zla ba re la gsung ngag ma lus pa la bshad pa'i bsam mno tshar re/ nyin zhag re la rdo rje'i tshig rkang drug gam bdun 'don pa'i dam bca' mdzad nas byon/ de nas sa skyar bzhugs tsa na rje dgon pa ba bsnyungs nas shog gsungs pa'i phrin byung bas bla chen gyis kyang rings par byon te/ sag thang sdings kyi phu rur slebs tsa na la spangs dug gis dbu bsnyungs ba dang / sa 'phyis pas ma slebs par de'i nub mo de kar gzims/