[A:75]dka' ba 'ga' zhig dgos pa khyad par can mthong ba'i tshe mchod pa'i khyad par dang bcas pas gsol ba btab nas zhus na rnal 'byor dbang phyug gis dngos su ston zhes rje pa nyid gsungs pa dang / bla ma la gus pa'ang bla ma yab sras nges par rdo rje 'chang yin pa la the tshom mi mnga' bar zhal bzhugs pa na sku gsung thugs ji ltar mnyes pa bzhin bsgrubs nas tha na kyal ka'i phyir yang gsung mi zlog /sku 'da' ba'i tshe'ang bdag nyid glud du gtong ba'i bar du mdzad/ sku 'das pa na phyogs ris kyi dge 'dun rnams spyan drangs nas chos 'khor bskor/ chos dang zang zing gi sbyin gtong rgya chen po mdzad/ phyi rten nang rten gyis thog drangs pa'i sku gzugs dang gsung rab 'gyur ro cog phal cher bzhengs/ gtsug lag khang dang mchod pa'i yo byad mang du bsgrubs/ dge 'dun brgya tsam gyi rten gzhi mdzad de/ mdor na chos dang zang zing ji snyed byung yang bla ma dkon mchog mchod pa dang / mgon med la ster bas bde ba can du gshegs tsa na gdan dang na bza' phrugs gcig ma yin pa gser til 'bru tsam mam/ yo byad bre gang ri ba ma bzung ba ni ngo mtshar che ba yin no/ /bzhi pa ni/ rje de nyid kyi zhal nas kho bo lo nyi shu pa'i lor g.yeng bas nyin phyed gcig gnyid du song ba'i rmi lam du mtshan brjod bton pas phyed tsam thon tsa na gnyid sad/ yang lo nyer gcig pa'i g.yeng bar nyin phyed tsam cig gnyid du song ba'i rmi lam na skye ba snga ma la bzung ba yin byas te/ mtshan brjod tshar gcig kha ton du bton pa rmis pa'i rjes su 'phags pa 'jam dpal skye ba bdun gyi bar du yi dam gyi lha'o zhes lung bstan pa rmis gsungs/