[A:2] / /gsung ngag rin po che'i bla ma brgyud pa spyi'i rnam thar gyi 'phros dpal e waM chos ldan gyi gdan rabs nor bu'i phreng ba zhes bya ba bzhugs so/ // /oM swa sti/ phun tshogs dge legs kun gyi yid bzhin gter/ /dbang gi rgyal po rtsa brgyud bla ma la/ /gus pas btud nas nga yi brgyud don bri/ /byin rlabs dngos grub gru char deng 'dir stsol/ /'dir gsung ngag rin po che lam 'bras bu dang bcas pa'i gdams ngag gtan la 'bebs pa la/ thog mar man ngag gi byung tshul/ byung ba'i chos la bshad sgrub bya tshul/ sgrub pa mthar phyin nas gzhan don bya tshul dang gsum las/ dang po la/ bla ma spyi'i lo rgyus dang / so so'i lo rgyus gnyis las/ dang po la lam 'bras glegs bam na bzhugs pa'i bla ma rgya bod kyi lo rgyus/ dmar gyis zhib mo rdo rje bar ston gyis mdzad pa'i lo rgyus/ bla ma dam pa bsod nams rgyal mtshan gyis mdzad pa'i rnam thar ngo mtshar snang ba/ rdo rje 'chang kun dga' bzang pos mdzad pa'i gsung ngag bstan pa rgyas pa'i nyi 'od de'i kha bskang mkhas mchog gung rus mdzad pa dang / go ram bstan pa'i nyi ma bsod nams seng ges mdzad pa dang / mnga' ris pa tshul khrims 'od zer gyis mdzad pa'i lam 'bras chos 'byung / mang thos klu sgrub rgya mtshos mdzad pa/ dpal sa skya pa sngags 'chang ngag dbang kun dga' bsod nams kyis mdzad pa'i chos 'byung rgyas bsdus sogs spyi'i rnam thar rnams dang / gnyis pa so so'i rnam thar ni/ rje sa skya pa chen po'i rnam thar nas brtsams te/ rtsa ba'i bla ma'i bar gyi rnam thar pusti logs na bzhugs pa'i lung mdzad pa de yin/ 'dir spyi'i lo rgyus sam/ chos 'byung gsung ngag bstan pa rgyas pa'i nyi 'od mjug ma rdzogs pa 'phro can du yod cing / de la gsum pa rje btsun sa skya pa yab sras rnams kyis dar bar byas tshul ni zhes pa man gyi kha bskang rje btsun gung ru dang / kun mkhyen gyis mdzad pa gnyis yod pa las/ 'dir yang de'i 'phros kha bskang ba ste/