[A:3] rje rdo rje 'chang yan gyi rnam par thar pa rnams deng sang phyogs gcig tu lung byed pa shas che zhing / de man tshang 'grig dka' bar 'dug pas/ 'dir mdor bsdus te brjod na/ spyir sngon lam 'bras lugs srol bco brgyad sogs 'byung ba yin na'ang / deng sang sa lugs ma gtogs gzhan cher mi snang / sa lugs 'di las sa skya 'khon gyi gdung brgyud rnams dang / bstan 'dzin ngor rdzong tshar gsum sogs mkhas grub mang po'i rnam par thar pa'i legs byas dpag med snang mod/ 'dir skabs su babs pa/ rgyal bas lung bstan pa/ 'jig rten dbang phyug gi sprul pa'i sku/ rgyal ba gnyis pa rje btsun rdo rje 'chang kun dga' bzang po zhes snyan pa'i ba dan srid pa gsum na gsal ba de nyid kyi phrin las rgyun ma'i gtso bo dpal e waM chos ldan gyi chos grwa chen po 'di nyid kyi gdan sa pa rim phebs rnams kyis gsung ngag rin po che 'dzin skyongs spel gsum mdzad pa'i ri mo cung zad cig spel ba la/ rje rdo rje 'chang rgyal bas lung bstan tshul/ rgya bod du bstan pa la bya ba byas tshul sogs rnam thar mang po'i bcud bsdus pa/ legs bshad chu bo 'dus pa'i rgya mtsho zhes bya ba sngar bkod zin pa'i 'phros don la/ rje bla mas bya lo la dgon gnas btab nas dgung lo don lnga'i bar 'gro don mdzad cing / gdan sa glo bo sogs snga phyi kun dril bas lam 'bras kyang tshar brgyad cu gya gsum tsam song zhing / de la sogs pa'i rnam par dkar ba'i phrin las bsam gyis mi khyab ste/ rje mus pas mdzad pa/ gu ge paN chen/ sangs rgyas rgyal mtshan/ srad pa kun blo/ gu ge chos dpal bzang po sogs/ slob ma rnams kyis mdzad pa'i yi ge rnams dang / de thams cad kyi sdud pa kho bos bris pa'i rnam thar legs bshad rgya mtshor shes par bya'o/ /de nas gdan rabs rim par brjod pa ni rgyal ba rdo rje 'chang chen po kun dga' bzang