[A:36] byang chub sems dpa' rnams kyi gtso bo/ thar pa 'dod pa rnams kyi 'dren pa/ lam du zhugs pa rnams kyi ded dpon/ rigs pa dang grol ba'i spobs pa thun mong ma yin pa la mnga' brnyes pas slob ma'i the tshom gyi dra ba rnam par 'dren pa'i ye shes dang / ye shes kyi 'jug yul shes bya rnam par dag pa la dbang 'byor pas/ gnas dang gnas ma yin par spyod pa la bsnyengs pa mi mnga' ba/ rang dang gzhan gyi grub pa'i mtha' rgya mtsho'i pha rol du byon pas/ sgrub pa dang sun 'byin pa'i cha la rmongs pa'i thib po bsal ba/ chos dang chos ma yin pa rnam par 'byed pa la mkhas pas gdul bya'i rgyud yang dag pa'i lam la sbyor ba'i rtsa lag chen por gyur pa'i dpal sa skya pa chen po de ni/ nges par rdo rje 'chang chen po nyid yin par the tshom mi za bar rang nyid la nges shes khyad par can skye la/ dam pa'i grogs 'ga' zhig gis kyang gtan tshigs dang bcas pas de ltar nges shes skyes pa dag 'dug mod kyis/ 'on kyang re zhig skye bo phal mo che la ji ltar snang ba de mdo tsam zhig brjod do/ /de brjod na/ rje btsun chen po 'phags pa'i gang zag thams cad la grags pa yon tan rin po che du ma'i rgyal mtshan du gyur pa'i bdag nyid chen po 'di/ klu'i rgyal po'i tshul du yum la rmi ltas su bstan nas lhums su zhugs so/ /gnod pa med cing bde bar gyur la bkra shis pa'i ltas dang / bang mdzod 'phel ba la sogs pa byang chub sems dpa'i rnam par thar pa dang mthun par bltams so/ /cung zad mno shes nas dben pa la dges shing brkam chags med la yon tan gyi cha kho na sgrub pa la brtson pa byis pa'i spyod pa las 'das pa zhig tu gyur te/ de nas dgung lo brgyad lon pa dang byang chub sems dpa' zla ba rgyal mtshan zhes bya ba'i sdom brtson chen po de las tshangs par spyod pa'i dge bsnyen nos