[A:147]gyi gnas su/ rgya gar lho phyogs kyi 'phrog byed dga' bo la sogs pa'i phas kyi rgol ba ngan pa drug lung rigs kyis tshar bcad de rgyal ba'i bstan pa la bcug/ gang gi snyan pa'i rnga sgra gangs ri'i ljongs 'dir ma shongs te/ rgya dkar nag dang hor bal gyi ljongs thams cad kyang gang bar byas/ drug cu rtsa gsum pa'i tshe/ stobs kyi 'khor los bsgyur ba rgya nag mtha'i rgyal po go dan gyis bsod nams kyi mgron du spyan drangs/ drug cu rtsa lnga pa me pho rta'i lor pho brang chen po ling chu rtser gdan phebs/ rgyal pos nyams sad pa'i phyir sgyu ma'i dri gtsang khang khang phran gyis bskor ba'i gtsug lag khang gi sgyu 'phrul gyi rwa bar spyan drangs pa'i tshe/ ting nge 'dzin gyi mthus brtan par bzhugs su gsol te/ byang phyogs sprul pa'i sde'i gtsug lag khang zhes phyogs kun tu snyan pas grags/ sgyu ma'i mkhan po la bslus chen po der byung / rgyal po 'khor bcas dga' bdes yid rab tu gsos/ bdun cu pa'i bar du rgya nag po'i yul du bshad sgrub kyi bstan pa spel/ lcags phag smal zla'i bcu bzhi'i tho rangs sku'i bkod pa re zhig bsdus/
sku'i skye ba phyi ma mkha' la spyod pa'i rig pa 'dzin pa'i gar gyis rol/ de nas gnyis pa'i tshe/ shar phyogs mu mu nir rgyal po nyi ma stobs 'phel gyi sras dam par gyur te sa lam phal cher bgrod/ de nas gsum pa'i tshe mngon dga'i zhing du bde bar gshegs pa dri ma med pa'i dpal zhes bya ba'i sangs rgyas/ longs sku'i cha byad sku mdog gangs ri'i mdog can chos 'chad kyi phyag rgya can rin po che'i rgyan dang rab tu mdzes pa'i gos klubs pa dag pa'i 'khor 'bum gyis bskor ba'o/