[A:266]pha nang du 'ong ba na de ltar bris pa mthong nas/ khyim du su byung zhes tsandra go mi'i ma la dris so/ gzhan su yang ma 'ongs te bu lkugs pa blta zhing bri'o/ der phas bu la dris pa na ma'i gdong la blta zhing 'dug go/ /mas smros shig byas pas/ 'di ni bdag gis bris pa yin te/ rgol ba 'di ldog pa ni dkar ba ma yin no zhes zer/ de nas nang par zhig na tsandra go mi dang / mu stegs kyi ston pa de rtsod par tsandra go mi rgyal de bya dga' chen po thob/
de nas sgra dang rtog ge la sogs pa'i rig gnas thun mong ba thams cad ma bslabs par rang shes shig byung ste/ phyogs thams cad du grags pas khyab bo/
de nas theg pa chen po'i slob dpon zhig la skyabs su 'gro ba dang / bslab pa'i gnas lnga blangs slob dpon chen po blo gros brtan pa la mdo sde dang mngon pa'i sde snod nan cher lan cig nyan pa tsam gyis mkhyen/ rig pa 'dzin pa'i slob dpon mya ngan med pa zhes bya ba la bka' lung nod de rig sngags bsgrubs pas 'phags pa spyan ras gzigs dang / sgrol ma'i zhal mngon sum gzigs/ shin tu mkhas pa chen por gyur/
de nas shar phyogs su rgyal po bha ra Sha yul du sman dpyad dang sdeb sbyor dang bzo'i gnas kyi ston pa mang du byas/ khyad par du sgra rig pa mang du bshad cing yod/ de'i tshe rgyal po'i bu mo ta rA zhes bya ba bag mar blangs shing rgyal pos yul 'khor zhig kyang sbyin/ lan cig de'i g.yog mos ta rA zhes 'bod kyi 'dug pas/ yid dam dang mtshan mthun pa khyim thab tu mi rung ngo snyam nas/ slob