[A:272]de nas lho phogs su phyin/ rgyal po bde byed sgra slob par 'dod pa la/ sgra pA Ni yongs su rdzogs par shes pa'i slob dpon ma rnyed nas/ klu'i rgyal po she Sha zhes bya ba pA Ni pa yongs su rdzogs pa shes pa zhig yod par shes nas/ bram ze mchog sred kyi rig sngags kyi mthus bkug nas shlau ka 'bum gyi pA Ni pa'i don thams cad rgya cher 'grel nus par 'chad par byas shing / slob dpon gyis yi ger 'bri ba las/ de gnyis kyi bar du yol bas chod par byas so/ /shlau ka stong phrag nyi shu rtsa lnga song ba na/ de'i lus ni ci 'dra snyam slob dpon gyis yol ba btegs nas bltas pas/ sbrul chen po 'gying ba mthong / klu yang ngo tsha nas bros so/ /
de man chad du slob dpon nyid kyis 'grel pa byas te/ de la ni tshigs su bcad pa stong phrag bcu gnyis kyi tshad las med do/ /de gnyis bsdoms pa la klus bstan pa'i brda sprod pa zhes grags/ der sgra la sogs pa'i rig pa'i gnas rnams kyang mang du bstan/ mthar nag po chen pos phrag pa la thogs te/ ri rab kyi rtse mo yongs 'du sa brtol gyi gnas su gshegs so/ /zhes grags so/ /
der rgyal po bde byed slob dpon mchog sred kyis byas pa'i 'grel pa la yid ma ches par/ bram ze sapta warma gzhon nu gdong drug bsgrub tu bcug go/ /grub nas khyod ci 'dod zer ba la/ indra byA ka ra Na shes par 'tshal lo byas pas/ siddhi warNas ma nA ya/ zhes brjod pa tsam gyis sgra'i don mda' dag shes so/ /
sngar bod du grags pa'i lo rgyus ltar na/ ka lA pa'i kun bshad bzhi