[A:16] chos kyi 'khor lo lan gsum du bzlas te bskor ba'i dang po'i tshe kauNDi Nyas mthong lam thob/ gnyis pa'i tshe kauNDi Nyas dgra bcom pa/ gzhan bzhis mthong lam/ gsum pa'i tshe gzhan bzhis dgra bcom pa thob cing / ston pa'i smon lam gyi mthus/ lnga sdes mthong lam thob pa'i tshe/ bsnyen rdzogs kyi sdom pa yang thob pas/ nges zhugs sam ye shes khong chud kyi bsnyen rdzogs kyi sdom pa zhes grags so/ dus de'i tshe bstan pa 'di la lung rtogs kyi chos 'khor dang / skyabs dkon mchog gsum sogs thog mar byung ba'i dus yin pas dus bzang po gnyis pa'o/ 'di'i tshangs pa ni gdong pa lnga par lung las bshad cing / tshangs pa gdong bzhi pa ni 'dod khams kyi tshangs pa kho na'i zhes kho bos sems so/
'dir sngon gyi mkhas grub 'ga' zhig dang / rje rdo rje rgyal mtshan pas dus chen 'di ni drug pa'i tshes lnga la rigs te/ rgyu mtshan sangs rgyas nas zhag bdun phrag bdun du chos 'khor ma bskor bas/ de thim pa'i tshe bskor ba gang zhig bdun phrag bdun 'das pa'i phyi de'i zhag ni drug pa'i tshes lnga la 'byung ba'i phyir ro/ zhes gsungs mod/ skyon med de sa ga'i tshes bco lnga'i phyi de tshes bcu drug bdun phrag rtsis na de ltar yin kyang / tshes bco lnga nas rtsis pa'i bdun phrag nas bdun 'das pa'i phyi de'i zhag ni drug pa'i tshes bzhi nyid la 'byung ba'i phyir ro/
de nas wA ra na si'i khyim bdag rigs kyi gtso bo'i bu grags pa/ gang po/ dri ma med pa/ ba lang bdag/ lag bzang ste nye ba'i lnga sdes dgra bcom pa thob/ de lnga ni tshur shog gi bsnyen par rdzogs pa'i thog ma yin no/ rtsa ba'i sde lnga ni mthun pa'i grogs yin pas lnga sde dang / 'di lnga ni spun yin