[A:320]sna tshogs gsal ba snyan ngag me long dang / /dpal bsam 'khri shing la sogs tha snyad kyi/ /gtsug lag phal cher zhus shing nan tan byas/ /rang bzhin rkyen dang rnam 'gyur la sogs pa/ /dus dang don la 'jug tshul cung zad shes/ /saM skr-ita dang bod kyi klog tshul la/ /snga rabs 'chad tshul rab tu mang na yang / /skyon med 'dri dang brjod pa'i tshul shes pa/ /mkhas pa'i gtsug rgyan 'di nyid bka' drin las/ /gzhan la 'chad dam rang nyid nyams su len/ /ji ltar byed kyang lag nom mi dgos tsam/ /zhes gsungs shing spyir mdo sngags mtha' dag gi bstan pa gsal bar mdzad cing / lhag par ngor chen dkon mchog lhun grub sogs mkhas pa mang po la rig gnas kyi bshad rgyun rgyas par stsal zhing / ding sang gi bar ngu yang ngor phyogs na shin tu dar ba byung ngo / /) rje btsun sprul pa'i lo chen ratna bha dras kyang / spyir mdo sngags kyi bshad pa dang / sgos rig gnas la ched rtsol du mdzad pas/ byang phyogs 'dir rig gnas kyi bshad rgyun ches cher dar zhing / lhag par slob ma'i mchog grub chen thang stong rgyal po'i gdung 'dzin cing / rgya gar gyi paNDi ta mi tri pa'i sku skye ba rje btsun sprul pa'i lo tsA ba chen po 'gyur med bde chen ni spyir mdo sngags rig gnas la mkhyen pa che zhing / lhag par rig gnas la phul du phyin ba'i bshad rgyun spel zhing / byang chos rgyal gyi ti shri mdzad de ding sang gi bar du 'gro don rgya chen por bzhugs bzhin pa 'di ga'o/ /
de la slob ma mtha' yas kyang dge bshes stag tsang lo tsA ba ratna seng ge la bshad pa'i rgyun cher babs so/ /