[A:21] 'thad par sems te/ cho 'phrul gyi dus chen ni/ gzugs can snying po dang / gsal rgyal sogs kyis bskul nas mnyan yod du bstan pa yin la/ gong gi cho 'phrul gyi lo zla de ni/ ston pa sangs rgyas pa'i phyi de'i lo yin pas dus de'i tshe/ mnyan yod rgyal byed kyi gtsug lag khang sogs ma thebs shing mnyan yod du bstan pa ma byung ba'i phyir ro/ des na kho bo ni lha babs kyi dus chen/ ston pa sangs rgyas pa'i lo drug pa la yab sras mjal te yab bden pa la bkod/ ston pa bltams nas zhag bdun na yum 'das te/ sum cu rtsa gsum du skyes pa de nyid bden pa la bkod pa'i phyir du/ sangs rgyas pa'i lo bdun pa sa pho sprel lor lha gnas su dbyar gnas mdzad de 'dzam gling du babs pa'i dus chen yin par mngon te/ rgyu mtshan ston pa'i dbyar gnas kyi rim pa brjod pa na dbyar gnas bdun pa sum cu rtsa gsum du mdzad ces 'byung ba'i phyir ro/
cho 'phrul gyi dus chen la lo'i nges pa ma rnyed cing / mkhas pa dag la 'di skad ces gleng ste/ cho 'phrul gyi dus chen/ lhas byin gyi mtshams med kyi las gsum rdzogs pa'i snga rol du byung ngam/ phyis su byung / snga ma ltar na cho 'phrul gyi tshe ston pa rdzogs byed sogs tshur lhung nas shi'o zhes mdzangs blun dang 'dul lung gnyis char nas bshad pa las/ lhas byin gyis mtshams med kyi las gsum byas te 'gyod pa na/ rdzogs byed kyis chad lta bstan nas log ltas dge rtsa chad par 'dul lung las bshad pa dang 'gal bar mi 'gyur ram/ gal te phyi ma ltar na/ cho 'phrul bstan pa'i sbyin bdag ni gzugs can snying po dang / gsal rgyal sogs yin par mdo lung gnyis char nas