[A:25]mgu bar/ phyis kyi ston pa yang dag rgyal ba can las rab tu byung ba na/ de yang nad kyis zin te/ mthon po rnams kyi mtha' ltung 'gyur// bsags pa'i mtha' ni 'dzad pa ste// gson pa'i mtha' ni 'chi ba ste// 'dus pa'i mtha' ni 'bral ba yin// zhes dus kyi chos dang ldan par gyur te/ de'i mchid kyis gangs kyi ri dang nye ba chu bo skal ldan shing rta'i 'gram/ drang srong ser skya'i bsti gnas dang ha cang mi ring bar shAkya'i rigs las rab tu byon pa'i sangs rgyas yod kyi/ der rab tu byung zhig ces lung bstan/
de'i tshe ston pa 'od ma'i tshal na bzhugs pas/ 'phags pa rta thul gyi spyod lam gyis sems yid 'phrogs te/ des/ chos rnams gang dang rgyu las byung ba dang / zhes sogs kyi tshigs bcad gcig gis shA ri'i bus bden pa mthong / shA ri'i bus de lan gnyis bzlas pas mo'u gal gyi bus bden pa mthong ste/ ston pas tshur shog gis bsnyen par rdzogs/ ston pa'i nyan thos kyi gtso bo mchog zung du lung bstan no/
de lta bu'i mchog zung ni ston pa dang mi 'bral bar smon lam btab pa'i dbang gis ston pa'i snga rol du mya ngan las 'das pa ni yin mod/ dus nam gyi tshe mya ngan las 'das snyam na/ 'dul ba lung gi tshig rigs 'ga' la gzhigs pa na/ ston pas brgyad cu lon pa'i phag gi lo'i ston pa mya ngan las 'da' ba'i snga rol tsam du mchog zung yang 'das par mngon te/ rgyu mtshan rgyal po gsal rgyal gyis/ shAkya'i grong rdal me tsu ru der ston pa la chos nyan pa'i tshe/ btsun pa/ bdag kyang na tshod rgas pa brgyad cu lon pa lags la/ bcom ldan 'das kyang na tshod 'gres pa brgyad cu lon pa lags so/