[A:28] byang phyogs ri rtse lnga zhes bya ba'i pha rol na u dum wa ra'i tshal yod de/ zhes sogs/ rtse lnga ste ri spos ngad ldan gyi pha rol 'dabs na u dum wa ra'i tshal yod par bshad pas/ de gnyis ka mtshan nyid pa yin nam/ dngos btags kyi khyad par yod dpyad dgos te/ mtsho ma dros pa na yod pa'i shing 'dzam bu dang / 'phags yul na yod pa'i shing 'dzam bu gnyis la dngos la cha mthun du bshad pa ltar yin no/ zhes dpyad dgos so/
gnyis pa ston pa sku mya ngan las 'das nas chos ji ltar dar ba la gnyis/ theg dman dang / theg chen gyi bstan pa dar tshul lo/
dang po la/ rab dbye las/ sangs rgyas gsung rab dri ma med// bsdu ba dang po zhes pa ltar// ston pa mya ngan las 'das pa'i phyi de'i lo sa pho byi ba'i lor/ 'od srungs/ kun dga' bo/ nye ba 'khor gsum gyis gtsos dgra bcom pa lnga brgyas/ gnas rgyal po'i khab tu/ sbyin bdag rgyal po ma skyes dgras byas te/ sde snod gsum zhal 'don du mdzad pa'i sgo nas bka' bsdu ba dang po mdzad/
'od srungs/ 'di ston par khas blangs kyi bsnyen par rdzogs par bshad cing / kun dga' bo'i mkhan po'ang yin la/ 'di nyid lo 'di nyid la mya ngan las 'das par mngon pas/ 'di'i sku gdung / ston pa'i phyag dar khrod kyi na bza' dang bcas te/ ri bya rkang can gyi mdun du ri gsum gyis bkag nas/ byams pa'i bstan pa ma shar gyi bar du byin gyis brlabs nas gnas par 'dul lung las bshad/ 'on kyang mdzod las/ shi ba la yang byin rlabs yod// mi brtan la med gzhan dag min// zhes brtan pa