[A:45] lo re bzhin gzhon du song nas lo bcu drug par gyur te/ lus rten gcig la sku tshe gnyis bzhes kun dril lo brgya nyi shu bzhugs so/ gdung rabs lnga nas 'di'i don shes par 'gyur ro zhes rmi lam du lung bstan/
de ltar tho tho ri snyan btsan/ khri snyan gzugs btsan/ 'bro snyan sde ru/ stag ri snyan (gnyan) gzigs/ gnam sri (ri) srong btsan te lnga'i ring la/ dam pa'i chos kyi glegs bam byung zhing / gnyan po gsang ba la mchod pa tsam byung bas/ chos kyi dbu brnyes pa'i gdung rabs zhes bya ste/ lha mo dri ma med lung bstan pa las/ nga yongs su mya ngan las 'das nas lo nyis stong lnga brgya na gdong dmar can gyi yul du dam pa'i chos dar bar 'gyur ro zhes lung bstan pa de 'di tsam la dgongs so zhes shes dgos so/
deb sngon du grags pa las/ nel pa paNDi ta na re/ nam mkha' las babs zer ba bon po nam mkha' la dga' bas bon gtam yin gyi/ don la paNDi ta blo sems 'tsho dang / lo tsA ba le the ses chos de gnyis khyer nas 'ongs pa la/ rgyal pos yi ge yang mi shes/ don yang mi go bas paNDi ta dang lo tsA ba phyir log zer ba 'di ga 'dra ste/ dus phyis rba gsal snang gis bal por phyin mkhan po zhi 'tsho dang mjal ba'i tshe/ mkhan po'i gsung las/ bod kyi btsan po dang khyod dang / nga dang gsum gyis 'od srung gi bstan pa la bya rdzi ma'i bu gsum du gyur nas bod du bstan pa spel ba'i smon lam btab pa yin te/ btsan po yang ma skyes khyod kyang nar ma son pas ngas 'di na rgyal rabs dgu'i bar sgug cing bsdad pa yin gsungs pa/ rba bzhed gtsang ma na snang ba'i phyir zhes bshad 'dug pa ltar/ don la'ang gnas sam