[A:94b]lugs srol mi 'dra ba 'phags skor/ ye shes zhabs lugs/ jo bo'i lugs kyi spyan gzigs dang gsum gsum po de dag las so sor mched pa la/ lo chen rin chen bzang po'i lugs/ 'brog mi'i lugs/ 'gos lo bsod nams rtse mo'i lugs/ mar lo chos kyi dbang phyug lugs/ kha che paN chen nas brgyud pa bdag nyid chen po sa paN gyi lugs/ chag lo chos rje dpal lugs/ jo bo chen po dpal ldan a ti sha'i lugs sogs 'phags lugs nyid kyi gsang ba 'dus pa mang po dang / yang ye shes zhabs lugs pa yang lo chen lugs/ gnyos lo yon tan grags lugs/ rwa lo rdo rje grags lugs/ gnyan lo dar ma grags nas sa chen kun dga' snying po la bka' babs pa 'jam rdor sa lugs la sogs pa du ma dang / yang jo bo lugs thun mong ma yin pa gsang 'dus spyan ras gzigs kyi dbang sogs dpag tu med pa zhig byon pa yin kyang / mar lugs/ 'gos rdog gi lugs/ de las gyes pa sa lugs snga ma/ de dag la ma ltos pa sa lugs gsar ma dang bzhi'am/ yang sa lugs snga ma 'gos rdog gi lugs su byas na gsum du yang 'du bas/ de rnams ni deng sang gi bar du bka' ma nub cing ches dar ba yin zhing / ye shes zhabs lugs ni sa lugs 'di ma gtogs gzhan rnams deng sang phal cher chad nas med par sems la/ jo bo'i lugs kyi gsang 'dus spyan ras gzigs kyi chos bka' dang / bod yul bstan pa'i mnga' bdag rje btsun sa skya pa'i lugs kyi gsang ba 'dus pa 'jam pa'i rdo rje'i smin grol gyis bsdus pa'i chos skor rnams deng sang gi bar du rgyun ma chad pa dar rgyas su bzhugs pa 'di yin no/ /de dag gis ni ye shes zhabs lugs sogs lugs gzhan bstan pa yang bshad pa ste de rnams kyi sgo nas dpal gsang ba 'dus