[A:95a]pa'i dam pa'i chos byung ba'i tshul legs par bshad pa gsang 'dus chos kun gsal ba'i nyin byed ces bya la legs par bstan zin to/ /'dir smras pa/ zab mo'i mthar thug gsang ba 'dus pa yi/ /bstan la bka' drin che ba'i rgya bod kyi/ /mkhas grub lo paN brgyud par bcas pa yi/ /rnam thar dran pas lan brgyar phyag bgyi'o/ /sngon tshe skal bzang dpyod ldan skyes bu rnams/ /skye ba gtan gyi don chen bsgrub pa'i phyir/ /tshe 'di'i las la ji snyed mi sems par/ /rtag tu dam chos don gnyer kho nas brel/ /deng sang dus kyi chos par rlom pa rnams/ /'dir snang sred pa mi skya bas kyang che/ /des na lto rgyab phyid phyir mgo spu bregs/ /gos mdog bsgyur ba tsam la ngo mtshar ci/ /rab byung bsnyen par rdzogs par khas 'che yang / /'dul chos rgya mtsho slob pa lta zhog gi /ltung ba sde lnga'i blang dor tsam zhig kyang / /mi shes btsun par rlom rnams gad mo'i gnas/ /sems bskyed cho gas byang chub sems bskyed nas/ /phar phyin dbu ma'i gzhung lugs che ba la/ /thos bsam lta ci bslab bya rags pa yang / /spang blang mi shes rgyal sras 'di rnams mtshar/ /brgyud ldan bla mar smin byed dbang nos kyang / /bskyed rdzogs man ngag rgyud don zab mo la/ /ji snyam mi sems rtsa ltung ming don la'ang / /rmongs pa'i sngags 'chang 'di dag ches rab blun/ /des na dam pa'i chos la zhar byung dang / /don med tshe 'di'i don la a 'thas pa'i/ /chos gzugs rnams la bdag gi legs bshad gtam/ /lan brgyar smras kyang phan pa'i skabs ma rnyed/ /'on kyang rang nyid las 'phro bzang ba'i mthus/ /gzhon nu'i dus nas skyes chen gong ma yi/ /bstan pa spel ba'i rnam thar mthong ba'i tshe/ /bcos min dang 'dod dad pa yang yang skyes/ /de phyir bdag dang bdag gi dngos brgyud kyi/ /slob ma las 'phro ldan pa 'ga' re tsam/ /'byung bar 'gyur snyam de dag la brten nas/ /gsang 'dus bstan pa rgyas phyir ngas 'di bshad/ /de ltar dgongs la blo gros mig can rnams/ /gsang 'dus chos kun gsal ba'i nyin byed kyi/ /ngo mtshar bstan bcos 'di dang grogs gyis la/ /zab dang rgya che'i dpal ldan 'dus pa yi/ /chos rgyun bzhugs pa'i bla ma mang bsten la/ /thos bsam bsgom pas rang rgyud smin byas nas/ 'chad rtsod rtsom pas gsang 'dus bstan pa'i rgyun/ /yar ngo'i zla ltar 'phel zhing rgyas par mdzod/ /'di sbyar dge bas bdag cag dpon slob rnams/ /tshe mthar phyin zhing bsam don kun 'grub ste/ /spyi dang bye brag bstan pa rin chen 'di/ /mi nyams dbyar mtsho bzhin du 'phel bar shog /de rgyun bskal par rigs brgyud dri med kyis/ /rgyun du skyong zhing bdag cag dpon slob rnams/ /nam zhig tshe 'di'i snang ba nub ma thag /mi 'bral lhan cig bde ba can bgrod shog /ces dpal gsang ba 'dus pa'i dam pa'i chos byung ba'i tshul legs par bshad pa gsang 'dus chos kun gsal ba'i nyin byed ces bya ba 'di yang / 'jam mgon grub pa'i 'khor los bsgyur ba dpal sa skya pa chen po bsod nams dbang po'i zhal snga nas dang / yab rje sbas pa'i sangs rgyas sngags 'chang grags pa'i mtshan can/ rigs thams cad kyi khyab bdag rje btsun byang chub kyi sems rdo rje rgyal ba mus pa chen po sangs rgyas rgyal mtshan/ sprul pa'i sku lo nas spyan snga rin po che kun dga' don