[A:96a]bsod nams grags pa rgyal mtshan dpal bzang pos dpal 'dus pa'i chos 'byung snga phyi du ma dang bla ma so so'i rnam thar la brten nas 'phags pa'i yul na bha wa ra zhes pa/ gangs can gyi yul du dngos po zhes grags shing / rgya nag lugs la shing pho khyi'i lo/ uttA ra phAlgu ni zhes pa dbo zla ba'i pi ta de kA zhes pa'am/ ming gzhan dkar phyogs zhes yongs su grags pa'i dus tshes khyad par can dang / shu kra zhes pa re gza' pa sangs dang / utta ra phAlgu nI zhes pa skar ma bra dang / dhri ti ཿzhes pa sbyor ba 'dzin pa dang / ba bam zhes byed pa gdab pa dang / br-i Sha bha zhes pa khyu mchog gi dus la spyod pa'i nyin/ yon tan rin po che du ma'i 'byung gnas bod kyi rdo rje gdan dpal sa skya'i chos grwa chen po'i bzhi thog bla brang gi tshoms dmar gyi chos kyi rgyal po 'phags pa rin po che'i bzhugs khri padma can gyi drung ga la ba der sbyar ba'i yi ge pa ni/ rang dang nye bar gnas pa'i dge slong rdo rje 'dzin pa mdo sngags rab 'byams smra ba bsam gtan rgya mtsho zhes bya ba'i gsung rab kyi don la spyod pa'i blo gros kyis mig rab tu gsal ba de nyid kyi dad pa dang brtson 'grus bla na med pa'i sgo nas legs par bgyis so/ /bstan bcos 'di rdzogs par grub pa'i nyin kho na la/ nyang stod rkyang po lha khang nas lo chen rin chen bzang po'i thugs dam 'khrul med kyi gsang 'dus 'jam pa'i rdo rje'i dkyil thang rgya gar gyi ri mo dpe bral zhig dang / rnam rgyal lha dgu'i bris thang de dang 'dra ba ngo mtshar can zhig ste gnyis rtsol med du byung bas legs tshogs kyi rten 'brel rang 'grig tu byung ba yin no/ /dpal ldan gsang ba 'dus pa'i chos 'byung 'di/ /dpal ldan gdong bzhi gnyan po khyed la gtad/ /dpal ldan 'dus pa'i bshad sgrub bstan pa'i rgyun/ /dpal ldan sa skyar srid mthar gnas par mdzod/ /swasti dza yantu// //bkra shis rgyal bar gyur cig/ //