[A:6b] tshul nyid du nye bar bsgrubs pa na mkhan po'i mtshan las gras te/ bkra shis rnam rgyal zhes bya ba'i mtshan [B:17] du gsol lo/ /dus phyis dgung lo'i tshigs legs par tshang nas brtan mkhas gnyis ldan gyi mkhan po rje btsun su [C:266]ma ti kIrti dang / las kyi slob dpon 'dul ba 'dzin pa gnas brtan mkhas pa chen po kIrti nghwa dza zhes pa dang / gsang ste ston pa lkog tu bar chad dris nas nang du 'ong pa zhu ba la mkhas pa nam mkha' dpal dang / dus sgo brjod pa snar thang pa shes rab seng ge la sogs pa dge slong gi dge 'dun bcu'i tshogs kyis bsnyen par rdzogs pa dge slong gi dngos po thugs rgyud la bskyed nas/ tshul khrims mig gi 'bras bu ltar bsrung ba la mkhas par mdzad do/ /
spong sems gser gyi char pas sbags pa yi/ /
snying stobs gser ri'i rtse mor tshul khrims kyi/ /
nyin byed dad pa'i shing rtas legs drangs te/ /
thub bstan gling bzhi gsal bar khyod kyis mdzad/ /
bslab gsum nor bus gting mtha' med gang ba'i/ /
thub bstan rol mtsho'i dbus su bsti mdzad pa/ /
khyod sku gser gyi ri dbang brjid pa ni/ /
ngur smrig thun mtshams sprin gyis dra bas g.yogs/ /
de tshe mkha' la lha tshogs gar byed cing / /
dbang po'i gzhu yi gur khang nyams dga' ba/ /
ge sar rdul tshogs rgod pa'i 'dzum phreng can/ /
ngo mtshar mig gi dga' ston ci yang mthong / /
srid pa'i nags tshal sdug bsngal tshang tshing can/ /
gti mug mun par 'khyams pa'i 'gro 'di rnams/ /
khyod sku mdzes pa'i gzi 'od des reg tshe/ /
thar pa'i lam bzang snang bar byas pa snyam/ /
'gro kun srid pa'i mtsho las bsgrol mkhas