[A:2a]thabs shes skya ba g.yo ba'i rdzu 'phrul gyis/ /
rnam [C:257]grol yid bzhin gling du chas pa yi/ /
ngo mtshar gtam gyi dba' brlabs 'dir bskyod bya/ /
skyes bu dam pa rnams ni sems can gyi don la nam yang brtun pa mi lhod pa'i dbang las/ bsams bzhin du srid par skye ba bzhes nas gdul bya'i skal ba dang mtsham par gang la gang 'dul gyi skur ston pa ste/ bdag nyid chen po 'di ni ma 'ongs pa'i dus su kun gzigs rgyal po zhes bya ba'i de bzhin [B:10] gshegs par mngon par rdzogs par 'tshang rgya bar 'gyur ba'i/ slob pa lam du byang chub sems dpa'i spyad pa spyod pa'i tshe 'phags pa 'jam pa'i dbyangs shes bya bar grags pa de'i rnam par sprul pa ste/ de dag gi mdzad pa'i mtha' ma lus pa ni dus gsum gyi bde bar gshegs pa mtha' dag gis kyang brjod pa las 'das na/ bdag 'dra bas ci zhig spobs/ de lta bas na snyigs ma'i dus 'dir kun mkhyen bkra shis rnam par rgyal ba zhes bya ba'i mtshan gyis