[A:2b]sems can gyi don mdzad pa'i tshul che long tsam zhig brjod par bya'o/ /
sku skye sngon ma'i lo rgyus kyi gtam/
de yang / sngon gyi skyes pa'i rabs ni bsam gyis mi khyab ste/ 'phags pa'i yul du ni grub pa'i dbang phyug nag po pa zhes bya bar grags shing / o rgyan gyi yul du ni indra bo dhi zhes bya ba dang / sham bha la'i yul du ni rgya mtsho'i blo gros shes bya ba la sogs pa sprul pa'i sku'i bkod pa mtha' yas pa ston par mdzad pa rnams las/ sku skye ba 'di'i snga ma ni/ mkhas pa mkhas pa zhes bya ba'i grangs su bgrang ba las kyang dngos grub kyis yang dag par brgyan pa'i skyes chen/ kun mkhyen dri med 'od zer ram klong chen [C:258]ram 'byam parab 'byams pa zhes kyang bya/ mtshan dngos rdzogs chen pa tshul khrims blo gros shes bya ba de nyid yin no zhes rje nyid kyis zhal gyis mches par thos so/ /
gzigs pa bdun du gzigs pa'i gtam/
de nyid kyi mdzad pa'i mtha' ma 'od gsal chos kyi sku la zhugs pa'i rjes las srid pa bar ma do'i tshul du bde ba can gyi zhing khams rnam par sbyangs nas/ rgyal ba 'od dpag tu med pa'i thugs kyi sras dam par bzhugs pa las/ sngon gyi smon lam gyi dus mkhyen pas mi'i 'jig rten gyi gdul bya 'dul ba'i dus la bab par dgongs pa na/ de bzhin gshegs pa 'od dpag tu med pas mi'i 'jig rten du'ang zhal dngos su bstan nas dge ba'i bshes gnyen mdzad par dam bca' ba brtan po dang bcas pas bskul ba'i tshe/ gang du 'khrungs par 'gyur ba'i yul gru dwags po'i sa'i thig le na/ de'i tshe sku rab [B:11] pa'i gdung rgyud nyid che zhing btsun par grags pas rgyal rigs dang rjes su mthun pa'i rigs la gzigs pa dang / rgyal po pu de gung rgyal