[A:47a]bab pas/ sku mdun du 'khyil ba zhag re bzhin je mang la song / zhabs kyi sor mo thams cad nu ma ji lta ba bzhin du gyur 'dug pa la/ bla ma phun tshogs pas [C:354]zhal gtad nas 'jibs pas/ sngar nyams su ma myong ba'i ro zhim po brjod mi shes pa zhig zhal du byung ba na/ chos rje kun dga' dpal bas kyang zhabs sor la 'jibs pas de kho na ltar byung ngo / /
rnam dkar zhing 'di'i mdzad pa yongs rdzogs tshe/ /
sa chen rnam pa drug tu g.yo byed cing / /
skar mda' 'khrug pa'i 'ong tshogs lhab lhab 'bar/ /
ri bo 'bir ba'i sgra chen ngur ngur sgrog/ /
khyod thugs dngul dkar dngas pa'i me long ni/ /
gnyis snang g.ya' dang bral ba'i dkyil 'khor ngor/ /
yi dam lha tshogs mang po'i snang brnyan gzugs/ /
gzhon nu mas mthong spro bzhin lhag ger gzigs/ /
gser gyi gdub bus mdzes pa'i 'chi med rnams/ /
puNDa ri ka'i me tog 'thor byed cing / /
bzhin gyi 'od kyis phyogs kun snang byas nas/ /
brgya byin gzhu yi lding khang 'god la brtson/ /
he ru kar bcas dpa' bo rnal 'byor mas/ /
gdugs dkar ba dan g.yob cing spyan drangs pas/ /
khyod sku de bzhin nyid du rab gshegs [B:89] te/ /
sprul sku rang gdangs chos kyi dbyings la thim/ /
thugs rje'i snang gsal rnam grol gzeb du son/ /
'gro ba'i sgron me dus min rlung gis bsad/ /
yid bzhin nor bu zhi ba'i 'dam du bying / /
phan bde'i nyin byed nag po'i sprin gyis bsgribs/ /
kye ma kyi hud gdul bya don mthun rnams/ /
phyogs slad 'gron po bzhin du mu cor bsgrog/ /
da ni khyod sku'i dpal de su yis mthong / /
khyod gsung nyan pa'i go skabs de yang bcom/ /
dam pa'i don du skye 'chi las grol kyang / /
rtag 'dzin can gyi zhen lta bzlog pa'i phyir / /
re 'ga' skye dang